Tbilisidə parlament binasının qarşısında keçirilən mitinqdə nümayiçilərlə polis arasında fiziki qarşıdurma yaranıb.
SİA xəbər verir ki, qarşıdurma zamanı həm nümayişçilərdən, həm də hüquq mühafizə orqanlarının əməkdaşlarından xəsarət alanlar olub. Polis nümayişçilərin dağıdılması üçün gözyaşardıcı qaz və rezin güllələrdən istifadə edib. Bundan sonra nümayişçilər parlament binası qarşısından uzaqlaşmağa başlayıblar.
Son məlumatlara görə, etiraz aksiyasında 38 polis və 17 nümayişçi yaralanıb. Bu barədə Gürcüstanın Səhiyyə nazirliyi məlumat yayıb. Bildirilib ki, xəsarət alanların bəzilərinin durumu ağır qiymətləndirilir. Xəsarət alan nümayişçilərin hamısının Tbilisinin müxtəlif xəstəxanalarına yerləşdirildiyi qeyd olunub.
Yaralanan polislərdən 4-ü xəstəxanaya yerləşdirilib, yerdə qalanlarına ambulator yardım göstərilib.
Yaralananlar arasında jurnalistlərin də olduğu bildirilir.
Qeyd edək ki, bir qədər öncə Baş nazir Mamuka Baxtadze, daxili işlər naziri Giorgi Qaxaria və Xüsusi Dövlət Mühafizə Xidmətinin rəhbəri Anzor Çubinidze parlament binasına gəliblər.
Xatırladaq ki, iyunun 20-də Parlamentlərarası Pravoslav Assambleyasının Tbilisidə keçirilən 26-cı Baş Assambleyası zamanı assambleyanın prezidenti, Rusiya Kommunist Partiyasının nümayəndəsi və Dövlət Dumasının deputatı Sergey Gavrilovun parlament sədrinin kürsüsündə əyləşərək toplantıya sədrlik etməsi etirazlara səbəb olub. O, bir müddət öncə Gürcüstanı reallıqla barışmağa, Abxaziya və Cənubi Osetiyanın müstəqilliyini tanımağa çağırmışdı.
S.Qavrilovun artıq ölkəni tərk etdiyi bildirilir.
Bu arada ölkənin keçmiş prezidenti Mixail Saakaşvili özünn “Facebook” səhifəsində onun hakimiyyəti dövründə “yaratdığı polis”ə işə qəbul olunmuş şəxsləri xalqın tərəfinə keçməyə çağırıb.
Gürcüstan prezidenti Zurabişvili dərhal özünün “Facebook” səhifəsində Saakaşviliyə cavab verib: “Başqa ölkənin vətəndaşının bizim ölkəmizdə “yaratdığım polis”I itaətsizliyə çağırıram deməsi, eyni zamanda, bu müraciətin ictimai televiziyada yayılması yolverilməzdir”.
Gürcüstan Daxili İşlər Nazirliyi isə bəyanat yayaraq parlament binasına hücumun daha da şiddətləndiyi müşahidə edildikdən sonra gözyaşardıcı qazdan istifadə edildiyini bildirib və ölkə müxalifətinin bugünkü aksiyasını “dövlət çevrilişinə cəhd kimi” qiymətləndirib.
Bütün xəbərlər Facebook səhifəmizdə
USD
EUR
GBP
RUB