Böhran nəticəsində işsiz qalmış bir çox amerikalılar üçün daha çətin dövr başlanır. Onlar işsizliyə görə dövlət müavinəti almaq imkanını itirirlər. Şənbə günü bu müavinətlərin qüvvədə olması müddəti bitir.
1,3 milyon adamın dolanacaq vəsaitindən məhrum olacağı gözlənilir. Kaliforniya ştatına daha ağır zərbə dəyəcək: bu ştatın 214 min sakini müavinət almaq hüququndan məhrum olacaq.
Nyu-York və Nyu-Cersi ştatlarında vəziyyət bir qədər yaxşıdır: burada hakimiyyət orqanlarının öz aralarında razılığa gələ bilməməsindən "zərərçəkənlərin" sayı müvafiq surətdə 127 min və 90 min nəfər olacaq. Özü də Nyu-Cersidə bu rəqəm ştatın bütün əhalisinin 1 faizindən çoxdur ki, bu da ölkə üzrə ən yüksək göstəricidir. Bu baxımdan Şimali Dakota və Cənubi Dakotada vəziyyət daha yüngüldür: bu ştatlarda əhalinin yalnız 0,05 faizini belə kədərli qismət gözləyir.
İşsizliyə görə müavinətlərin verilməsi proqramı 2008-ci ildə, resessiya nəticəsində işini itirmiş insanlara kömək məqsədilə həyata keçirilməyə başlanmışdı. Həmin vaxtdan ABŞ Konqresi onun qüvvədə olması müddətini 11 dəfə uzadıb, lakin 2014-cü maliyyə ili üçün federal büdcə haqqında ABŞ prezidenti Barak Obamanın lap bu günlərdə imzaladığı indiki qanuna bu tədbir daxil edilməyib.
Demokrat senator Cek Rid və respublikaçı konqresmen Din Heller növbəti dəfə müddətin üç ay uzadılması barədə təklif vermək niyyətindədirlər. Lakin bu, yanvardan, yəni qanunvericilərin bayram tətilindən qayıtmasından tez olmayacaq.
Konqresin Nümayəndələr palatasının spikeri respublikaçı Con Beyner xəbərdarlıq edib ki, bu addımı yalnız o zaman dəstəkləyəcək ki, bu məqsədlər üçün xərclər başqa proqramların ixtisar edilməsi hesabına əldə olunmasın.
Demokrat senator Cek Rid jurnalistlərə deyib: "İnsanlıq baxımından belə vəziyyət ağlasığmazdır". Onun sözlərinə görə, "qanunvericilər buna yol verməməlidirlər".
Cümə günü Ağ ev Konqres üzvlərini bu qanun layihəsini mümkün qədər tez qəbul etməyə çağırıb.
Müavinətlərin qüvvədə olma müddətlərinin uzadılmasının əleyhdarları belə bir məsələyə diqqəti çəkirlər ki, işsizliyin səviyyəsi azaldıqca müavinətlər də aktuallığını itirir. Hazırda işsizliyin səviyyəsi təqribən 7 faizdir və mütəxəssislərin proqnozlarına görə, gələcəkdə daha da azalacaq.
Məsələn, "Moody`s" reytinq agentliyinin analitik bölməsinin baş iqtisadçısı Mark Zandi belə hesab edir ki, müavinətlərin sayının azalması əmək bazarında vəziyyətin yaxşılaşmasına gətirib çıxaracaq.
Onun fikrincə, bir çox adamlar ayda təqribən 1,2 min dollar təşkil edən bu müavinəti alıb iş axtarmaqdan əl çəkir və sadəcə işsiz hesab olunmağı daha üstün tuturlar.
Bütün xəbərlər Facebook səhifəmizdə
USD
EUR
GBP
RUB