Moskvada Azərbaycanın müstəqilliyinin yenidən bərpa etməsinin 20-ci ildönümü qeyd edilib

Moskvada Azərbaycan Respublikasının müstəqilliyini yenidən bərpa etməsinin 20-ci ildönümünə həsr olunan "Azərbaycan gecəsi" adlı təntənəli mərasim keçirilib. SİA-nın verdiyi məlumata görə, Heydər Əliyev Fondunun təşəbbüsü, ölkəmizin Rusiyadakı səfirliyinin dəstəyi ilə baş tutan və Dövlət Kreml Sarayında keçirilən mərasimdə Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva və Rusiyanın birinci xanımı Svetlana Medvedeva iştirak ediblər.
Kremlin Uspensk kilsəsinin önündə Azərbaycanın birinci xanımı Mehriban Əliyevanı Rusiyanın birinci xanımı Svetlana Medvedeva qarşılayıb.
Sonra birinci xanımlar arasında görüş olub.
Görüşdə S.Medvedeva Mehriban xanım Əliyevanı "Eurovision-2011" müsabiqəsində Azərbaycanın inamlı qələbəsi münasibətilə təbrik edib. Rusiyanın birinci xanımı deyib ki, Azərbaycan duetinin qələbəsi bu ölkədə musiqi mədəniyyətinin yüksək səviyyəsindən, Azərbaycana beynəlxalq marağın artmasından xəbər verir.
RF Prezidentinin xanımı Azərbaycanda sayı təxminən 130 min nəfərə çatan həmvətəninin yaşaması üçün əlverişli şəraitin yaradılması istiqamətində respublika rəhbərliyinin səylərini vurğulayıb. O, bu ölkədə rus dilində təhsil almaq imkanlarına görə Azərbaycan tərəfinə minnətdarlığını bildirib.
Birinci xanımlar azərbaycanlı tələbələrin Rusiyada təhsili məsələlərini də müzakirə ediblər. Bildirilib ki, Azərbaycan tolerant ölkədir, burada müxtəlif dinlərin nümayəndələri əmin-amanlıq şəraitində yaşayırlar. Azərbaycanda Rus Pravoslav Kilsəsinin uğurla fəaliyyət göstərdiyi də vurğulanıb.
Sonra Azərbaycanın və Rusiyanın birinci xanımları Uspensk kilsəsinin sərgi salonunda "Karl Faberje və daşoyma ustaları. Rusiyanın əlvan dəfinəsi" adlı ekspozisiyaya baxıblar. Ekspozisiyada görkəmli rus zərgəri Karl Faberjenin şah əsərləri nümayiş etdirilir. Bütün dünyada tanınan zərgər Karl Faberje 1846-cı ildə Sankt-Peterburqda zərgər ailəsində dünyaya gəlmişdir. Faberje Zərgərlik Evi rus çar ailəsi üçün özünəməxsus tərzdə zinət əşyalarının istehsalı sayəsində məşhurlaşmışdır. Bu zərgərlik məmulatları virtuoz hazırlanma tərzi və ideyanın orijinallığı ilə seçilir.
Mehriban Əliyeva və Svetlana Medvedeva sərgidə Faberje ilə eyni dövrdə yaşayan və imperator sarayı üçün zinət əşyaları hazırlayan zərgərlərin, Ural sənətkarlarının işləri də tanış olublar. Ekspozisiyada İmperator, Yekaterinburq, Peterqof və Kolıvan fabriklərində istehsal edilən əsərlər də nümayiş etdirilir.
Azərbaycanın birinci xanımı burada xatirə kitabına ürək sözlərini yazıb.

Dövlət Kreml Sarayında "Azərbaycan gecəsi" çərçivəsində Heydər Əliyev Fondunun ən uğurlu layihələrindən olan "Azərbaycan" nəşrinin rus dilindəki versiyasının təqdimatı olub. Oxuculara odlar yurdu Azərbaycan haqqında müfəssəl məlumat vermək məqsədi ilə ərsəyə gətirilən nəşrdə toplanan 1000-dən çox şəkil xalqımızın qədim tarixini, ənənələrini, mədəniyyətini, etnoqrafik xüsusiyyətlərini əks etdirməklə yanaşı, ölkəmizin keçmişini və bu gününü, müasir simasını da təcəssüm etdirir. Bu kitab oxucuda ölkəmiz haqqında əyani təsəvvür yaratmaq, onu tanımaq və sevmək baxımından çox böyük əhəmiyyətə malikdir. Kitabda paytaxt Bakı ilə bərabər, bütün bölgələr barədə şəkillər və materiallar əksini tapıb. Ölkəmizin qədim tarixinin, memarlığının, mədəniyyətinin bütün tərəfləri ilə əks olunduğu "Azərbaycan" nəşri ilə tanışlıq respublikamız və paytaxt Bakı haqqında dolğun təəssürat yaratmaqla, onun mədəniyyətlər və sivilizasiyaların qovuşuğunda yerləşməsindən xəbər verir.

Bu gecəyə Azərbaycan xalçalarının sərgisi də xüsusi ovqat gətirib. Coğrafi mövqeyinə, naxış, kompozisiyasına, rəng həlli və texniki xüsusiyyətlərinə görə Azərbaycan xalçaçılıq məktəbinin bütün istiqamətlərinin təmsil olunduğu bu sərgidə 80-dən çox xalça nümunələri nümayiş etdirilir. Sərgidə yer alan Qarabağ xalçaçılıq məktəbinin nümunələri Qarabağın əzəli Azərbaycan torpağı olduğunu bir daha hamının diqqətinə çatdırır.
Bu gün Azərbaycanda xalçaçılıq məktəbi özünün inkişaf dövrünü yaşayır. Xalqımızın milli sərvəti olan bu sahənin inkişafı ilə bağlı ölkədə həyata keçirilən tədbirlər, ilk növbədə bu qədim el sənətinin yaşadılmasına göstərilən diqqətdən irəli gəlir. Hazırda özünün yeni inkişaf mərhələsinə daxil olan xalçalarımız Azərbaycan mədəniyyətinin ən böyük hamisi olan Heydər Əliyev Fondunun həyata keçirdiyi layihələrlə daha da zənginləşir.
Azərbaycan xalçalarının Dövlət Kreml Sarayında nümayişi böyük maraqla qarşılanıb. Xalqımızın milli kimliyinin, soydaşlarımızın arzu və istəklərinin əks olunduğu bu xalçalar hər bir azərbaycanlının qəlb döyüntüsünü Moskva auditoriyasına uğurla çatdırıb.
Sonra Azərbaycan Respublikasının müstəqilliyini yenidən bərpa etməsinin 20-ci ildönümünə həsr olunan "Azərbaycan gecəsi" adlı təntənəli mərasim başlayıb. Mərasimi açan Rusiyanın tanınmış teleaparıcısı Vladimir Molçanov bu tədbirin əhəmiyyətini qeyd edib. O, "Eurovision-2011" müsabiqəsində Azərbaycan təmsilçiləri Eldar Qasımov və Nigar Camalın möhtəşəm qələbəsi münasibətilə təbriklərini çatdırıb.
Azərbaycanın birinci xanımı Mehriban Əliyeva mərasimdə çıxış edib. Tədbirə gələnləri salamlayan Mehriban Əliyeva Azərbaycan gecəsində iştirak etdiyinə görə Rusiya Prezidentinin xanımı Svetlana Medvedevaya xüsusi minnətdarlığını bildirib. Azərbaycanın birinci xanımı "Eurovision-2011" mahnı yarışmasında ölkəmizi təmsil edən Eldar Qasımov və Nigar Camal cütlüyünə səs verənlərə təşəkkürünü çatdırıb. Vurğulayıb ki, bu günlərdə Azərbaycanda hamı bu qələbə ilə, gənclərimiz və ölkəmiz ilə fəxr edir. Heydər Əliyev Fondunun prezidenti müsabiqədə səsvermə zamanı Azərbaycana ilk 12 balı verən Rusiyaya təşəkkürünü bildirərək qeyd edib ki, bu, iki ölkə arasındakı əməkdaşlığı bir daha nümayiş etdirir. Azərbaycan dövlətçiliyinin qədim tarixindən danışan Mehriban Əliyeva ölkəmizin həmişə Şərqlə Qərbi, Şimalla Cənubu birləşdirdiyini vurğulayıb. Bildirib ki, Azərbaycanda həmişə bütün xalqlar sülh şəraitində yaşayıblar. Tolerantlığın əsasları ölkəmizdə qədim dövrlərdən belə qoyulub.
Mehriban xanım Əliyeva Azərbaycanın müsəlman Şərqində ilk parlament respublikası olduğunu, burada ilk opera və baletin yarandığını bildirib, qazanılan uğurları qeyd edib. Sovet dövründə neft sahəsinin inkişafı, faşizm üzərində Qələbənin qazanılmasında Azərbaycanın rolu barədə danışan Mehriban Əliyeva deyib ki, biz ölkəmizin əldə etdiyi nailiyyətlərlə fəxr edirik.
Azərbaycanın birinci xanımı Azərbaycan-Rusiya əlaqələrinə toxunub, bu gün ölkəmizdə orta və ali təhsilin ana dili ilə yanaşı, rus dilində də tədris olunduğunu, Bakı Slavyan Universitetinin, Lomonosov adına Moskva Dövlət Universitetinin filialının, Rus Dram Teatrının fəaliyyət göstərdiyini bildirib.
Azərbaycanın birinci xanımı ötən il Bakıda Azərbaycan-Rusiya humanitar forumunun keçirildiyini, bu il artıq beynəlxalq humanitar forumun təşkil olunacağını diqqətə çatdırıb.
"Mədəni müxtəliflik qədim mədəniyyət və tarixə malik Azərbaycan xalqı üçün ənənəvidir", - deyən Mehriban xanım Əliyeva müstəqil dövlət kimi ölkəmizin 20 il mövcud olduğunu və bu qısa vaxtda böyük uğurların qazanıldığını vurğulayıb. Azərbaycanın iqtisadi sahədə əldə etdiyi nailiyyətlər haqqında danışan Heydər Əliyev Fondunun prezidenti ölkəmizin irimiqyaslı layihələr həyata keçirdiyini, dövlət siyasətinin sosialyönümlü olduğunu, 900 min yeni iş yerinin yaradıldığını, yoxsulluğun səviyyəsinin azaldıldığını, ölkədə yeni təhsil və səhiyyə ocaqlarının inşa edildiyini, parkların, teatrların yaradıldığını və yenidən qurulduğunu diqqətə çatdırıb. Bildirib ki, yalnız bu il Bakıda beşulduzlu altı hotelin açılması planlaşdırılır.
Ermənistan-Azərbaycan, Dağlıq Qarabağ münaqişəsi barədə məlumat verən Azərbaycanın birinci xanımı vurğulayıb ki, ölkəmiz bu məsələnin beynəlxalq hüquq normaları çərçivəsində həll olunacağına və ərazi bütövlüyümüzün bərpa ediləcəyinə ümid edir. "Bu gün bizim vizit kartımız – zəngin mədəni irsimizdir", - deyən Mehriban Əliyeva hamını Azərbaycana dəvət edib. "Sizi görmək biz azərbaycanlılara həmişə xoş olacaq", - deyən Azərbaycanın birinci xanımı Rusiya xalqına sülh, əmin-amanlıq və firavanlıq arzulayıb.

Daha sonra tədbirdə ölkəmizin incəsənət ustaları maraqlı konsert proqramı ilə çıxış ediblər. Xalq Artisti Rauf Abdullayevin dirijorluğu ilə Üzeyir Hacıbəyli adına Azərbaycan Dövlət simfonik orkestrinin ifasında Üzeyir Hacıbəylinin "Koroğlu" operasının uvertürası salona Azərbaycan ovqatı gətirib.
Mərasimdə Azərbaycan musiqisinin ən gözəl nümunələri səslənib, olduqca tələbkar auditoriyanı öz sehrinə salıb. Şirzad Fətəliyevin balabanda orkestrin müşayiətilə ifa etdiyi "Sən gəlməz oldun" mahnısı, xanəndə Təyyar Bayramovun çıxışı, Üzeyir Hacıbəylinin "Arşın mal alan" operettasından parçalar Azərbaycan adlı məmləkətin sahib olduğu və xalqımızın min illərdir qoruyub saxladığı qiymətli xəzinəni rus tamaşaçısına uğurla çatdırıb.
İsfar Sarabskinin ifa etdiyi "Novruz" caz kompozisiyası, xanəndə Mirpaşa Şükürovun ifasında "Qarabağ şikəstəsi" də mərasimə xüsusi ovqat qatıb.
Son dərəcə maraqlı konsert proqramı bir daha təsdiq edib ki, bu gün Azərbaycan mədəniyyətinin nadir incilərinin sorağı mötəbər mərasimlərdən gəlir.
Qara Qarayevin "Vals"ı, "Küçələrə su səpmişəm" məşhur xalq mahnısı, Natiq Şirinovun "Abşeron ritmləri" nağaraçalanlar ansamblının çıxışı və digər çıxışlar maraqla qarşılanıb.
Bu dəfə Azərbaycan mədəniyyəti Rusiya paytaxtını fəth edirdi. Moskvanın gündəmində yenə də Azərbaycan var idi. Bu dəfə bir qədər fərqli formada və təbii ki, fərqli ovqatda. İyirmi ildir öz sürətli inkişafı ilə dünyada lider olan ölkəmizin öz uğurlarını mədəniyyətin, musiqinin, bir sözlə, hamının başa düşdüyü dildə təqdim etməsi heç də təsadüfi deyildir. Çünki bu təcrübə Azərbaycanın timsalında dəfələrlə uğurla sınaqdan çıxarılmışdır və mədəniyyətlərarası dialoq platformasının yaradılmasında strateji məkan funksiyasını həyata keçirən ölkəmiz artıq mədəni dəyərləri, zəngin musiqisi ilə dünyanın diqqətini çəkir. Azərbaycan incəsənətinin məşhur simalarının çıxış etdiyi konsert də əsas diqqət çəkən məqamlardan biri burada janr müxtəlifliyi, sintez harmoniyasının, zəngin improvizasiyaların mövcudluğu idi. Elə auditoriyanı ən çox heyrətləndirən də bu olub.
Bu konsert Moskvada əsl mədəniyyət hadisəsinə çevrildi və diqqəti bir daha Azərbaycana yönəldib.
Bu son dərəcə maraqlı konsert proqramı bir daha təsdiq edib ki, Azərbaycan mədəniyyətinin nadir incilərinin sorağı mötəbər mərasimlərdən gəlir. Bu da, ilk növbədə Azərbaycan dövlətinin milli mədəni irsimizə olan diqqət və qayğısının nəticəsidir. Təbii ki, Heydər Əliyev Fondunun Azərbaycan mədəniyyətinin inkişafında oynadığı rol da əvəzedilməzdir. Elə bu mərasim də Fondun prezidenti Mehriban xanım Əliyevanın mədəni irsimizin qorunması və təbliği işində böyük xidmətlərinin göstəricisi olub.

Konsertdən sonra Azərbaycanın və Rusiyanın birinci xanımları arasında görüş olub.
Rusiyanın birinci xanımı Svetlana Medvedeva möhtəşəm gecəyə görə Mehriban Əliyevaya minnətdarlığını bildirərək deyib: "Zənnimcə, bu gecə xalqlarımız arasında dostluğun möhkəmlənməsinə xidmət edəcəkdir. Mədəniyyətinizə həsr olunmuş gecə, həqiqətən, mənim xoşuma gəldi". O, Üzeyir Hacıbəyli adına Azərbaycan Dövlət simfonik orkestrinin, gənc ifaçıların çıxışlarını yüksək qiymətləndirib.
Svetlana Medvedeva səmərəli fəaliyyətə, mədəniyyətə və gənc nəslə göstərilən diqqət və qayğıya görə Azərbaycanın birinci xanımına minnətdarlığını bildirib.
Azərbaycanın birinci xanımı Mehriban Əliyeva tədbirdə iştirakına görə Svetlana Medvedevaya minnətdarlığını bildirərək deyib: "Rusiya paytaxtında belə bir tədbirin təşkil edilməsi barədə qərarın qəbul edildiyi ilk gündən biz burada dəstək və anlayış gördük, özümüzü evimizdəki kimi hiss etdik. Bu xoş münasibətə görə, mən bütün Rusiya xalqına minnətdarlığımı bildirmək istəyirəm. Qonaqpərvərliyinizə görə çox sağ olun. Şadam ki, bu gecə alındı. Siz tamamilə haqlısınız. Bu gecə ölkələrimiz arasında dostluğun və mehriban qonşuluq münasibətlərinin möhkəmlənməsinə xidmət edəcəkdir. Şəxsi dəstəyinizə görə Sizə bir daha böyük minnətdarlığımı bildirirəm".

Təntənəli gecədən sonra qonaqlara Azərbaycan milli mətbəxinin nümunələri təqdim olunub.
Qonaqlar Azərbaycanın birinci xanımı Mehriban Əliyeva ilə görüşdə mərasimin yüksək səviyyədə təşkil edildiyini və belə gözəl gecənin keçirilməsi ilə bağlı təşəkkürlərini bildiriblər. Beləliklə, Azərbaycan mədəniyyətinin Rusiya paytaxtında nümayişi unudulmaz bir bayrama çevrilib. Burada nümayiş etdirilən mədəniyyət nümunələri mərasimə gələn hər bir kəsi odlar yurdu Azərbaycanla daha yaxından tanış edib.