Bakı Atatürk Liseyində Ulu Öndər Heydər Əliyevin xatirəsi anılıb

Ulu Öndər Heydər Əliyevin vəfatının 16-cı ildönümü ilə əlaqədar Türk Dünyası Araşdırmaları Vəqfi Bakı Atatürk Liseyinin hər iki binasında anım tədbirləri keçirilib. Liseyin müəllim və şagird kollektivinin iştirak etdiyi tədbirlərdə öncə Azərbaycan xalqının Ümummilli Lideri Heydər Əliyevin əziz xatirəsi bir dəqiqəlik sükutla yad edilib. Sonra Azərbaycanın və Türkiyənin dövlət himnləri səsləndirilib.

Tədbirləri giriş sözü ilə açan liseyin müdiri Eylem Gültəkin müasir Azərbaycanın memarı və qurucusu, Ulu Öndər Heydər Əliyevin zəngin dövlətçilik təcrübəsi, böyük istedadı ilə fərqlənən xarizmatik lider olduğunu bildirib: "Müasir Azərbaycanın memarı və qurucusu, Ulu Öndər Heydər Əliyev 1993-cü ilin yayında xalqın təkidli tələbi ilə yenidən siyasi hakimiyyətə qayıdaraq Azərbaycanı xaos və vətəndaş müharibəsindən xilas etdi. Ulu Öndər Heydər Əliyev Türkiyə dövlətinin qurucusu Mustafa Kamal Atatürk kimi milli, demokratik və dünyəvi bir dövlətin təməllərini atdı".

Ulu Öndərin Azərbaycan dövlətinin və xalqının taleyində oynadığı tarixi roldan, ölkəmizin gələcəyi üçün göstərdiyi misilsiz xidmətlərdən bəhs edən liseyin müdiri Ümummilli Liderin layiqli davamçısı olan Prezident İlham Əliyevin həyata keçirdiyi islahatlar nəticəsində Azərbaycanın gündən-günə gücləndiyini, beynəlxalq aləmdə müstəqil və sarsılmaz mövqeyə sahib olduğunu vurğulayıb. O, çıxışında Ulu Öndərin Azərbaycan-Türkiyə münasibətlərinin yüksəlişindəki əvəzsiz rolundan da bəhs edib.

Sonra çıxış edən liseyin müəllimi Sabir Əsədov Ümummilli Lider Heydər Əliyevin Azərbaycanın inkişafı naminə göstərdiyi fəaliyyət, ölkəmizin və xalqımızın müstəqilliyi uğrunda verdiyi taleyüklü qərarlar barədə danışıb. Sabir Əsədov Ulu Öndər Heydər Əliyevin istər sovet dönəmində, istərsə də müstəqillik illərində hakimiyyətdə olduğu zaman bütün sahələr kimi, təhsil sahəsinə də xüsusi diqqət və qayğı ilə yanaşdığını deyib.

Anım tədbirlərində Ulu Öndərin fəaliyyəti haqqında videoçarx nümayiş olunub, həmçinin liseyin şagirdlərinin ifasında Ümummilli Liderə həsr edilmiş mahnılar və şeirlər səsləndirilib.

Bütün xəbərlər Facebook səhifəmizdə