Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən, müasir avadanlıqla tam təchiz edilmiş yeni tikilən hərbi hissə istifadəyə verilib.
Müdafiə Nazirliyinin mətbuat xidmətindən bildiriblər ki, bu qurumun rəhbərliyi cəbhəboyu zonada yerləşən hərbi hissənin açılışında iştirak edərək yeni tikilən qərargah, əsgər yataqxanaları, döyüş texnikası üçün saxlanclar, sıra meydanı, yeməkxana, tibb məntəqəsi, qazanxana kompleksi və digər obyektlərlə tanış olublar.
Müdafiə naziri, general-polkovnik Zakir Həsənov hərbi hissənin şəxsi heyəti ilə görüşdə çıxış edərək Prezident, Ali Baş Komandan İlham Əliyevin ordu quruculuğuna göstərdiyi yüksək diqqətin nəticəsi olaraq son vaxtlar döyüş və mənəvi-psixoloji hazırlığın daha da gücləndirilməsi, hərbi qulluqçuların sosial-məişət şəraitinin yaxşılaşdırılması, maddi-texniki bazanın möhkəmləndirilməsi məqsədilə görülən işləri diqqətə çatdırıb.
Çıxışında son bir neçə ay ərzində üçüncü hərbi hissənin istifadəyə verildiyini vurğulayan nazir plana uyğun olaraq bu il daha bir neçə hərbi hissənin açılışının nəzərdə tutulduğunu bildirib. Zakir Həsənov deyib ki, ölkəmizin rəhbərliyi Silahlı Qüvvələrin inkişafını ən mühüm istiqamətlərdən biri hesab edir. Ordumuz müasir silah və texnika ilə təchiz olunur, şəxsi heyətin sosial bazasının möhkəmləndirilməsi məqsədilə yeni hərbi şəhərciklər, xidməti mənzillər tikilərək əsgər, gizir və zabitlərin istifadəsinə verilir. Bütün bunlar Ali Baş Komandanın Silahlı Qüvvələrə göstərdiyi diqqət və qayğının nəticəsidir.
Azərbaycan xalqının və dövlətinin bir problemi var – bu, Dağlıq Qarabağ problemidir. Bu məsələnin müsbət həll olunması istiqamətində mühüm işlər həyata keçirilir. Silahlı Qüvvələrin möhkəmləndirilməsi də dövlətin prioritet sahələrindən ən vacibidir.
Son vaxtlar Silahlı Qüvvələrimiz döyüş hazırlığını artırmaqla, döyüş qabiliyyətini yüksək səviyyədə saxlamaqla düşmən üzərində üstünlüyə nail olmaq vəzifəsini layiqincə yerinə yetirir.
Bu günlərdə xalqımız Xocalı faciəsinin anma tədbirlərini keçirdi. Biz hamımız, xüsusilə Silahlı Qüvvələrimizin şəxsi heyəti, xalqımıza qarşı törədilən bu soyqırımı heç vaxt unutmamalıyıq. Əminik ki, Xocalı faciəsini törədənlər mütləq ədalət məhkəməsi qarşısında cavab verəcək və cinayətkarlar layiqli cəzalarını alacaqlar.
Silahlı Qüvvələr güclü və möhkəm olmalıdır ki, xalqımız bir daha belə vəhşiliklə üzləşməsin. Biz öz döyüş imkanlarımızı və hazırlığımızı artırmaq məqsədilə silahlarımızı elə dərindən öyrənməliyik ki, xalqımızı qoruya bilək, düşmənə dağıdıcı zərbə endirməklə torpaqlarımızı işğaldan azad edək.
Artıq torpaqlarımızın azad olunacağı gün yaxınlaşır. Biz hər gün, hər an, hər təlimdə Silahlı Qüvvələrimizi möhkəmləndirməklə bu günü daha da yaxınlaşdırırıq.
Nazir yeni hərbi şəhərcikdə şəxsi heyətə xidmətdə uğurlar arzulayaraq deyib: "Arzu edirəm ki, yüksək səviyyədə təşkil olunmuş bu hərbi şəhərcikdə döyüş hazırlığınızı daim təkmilləşdirəsiniz və hərbi hissənin qarşısına qoyulan tapşırıqları hər an operativ şəkildə yerinə yetirməyə tam hazır olasınız".
Şəxsi heyət təntənəli marşla tribuna önündən keçdikdən sonra Müdafiə Nazirliyinin rəhbərliyi hərbi qulluqçularla birlikdə nahar edib.
Bütün xəbərlər Facebook səhifəmizdə
USD
EUR
GBP
RUB