\"Science\" jurnalının araşdırmasına görə, Azərbaycan doğulmamış qızları ən çox abort etdirilən ölkələrdən biridir. Sözügedən jurnalın araşdırmasından sonra belə məlum olub ki, Azərbaycanla yanaşı bu məsələ Çin, Hindistan, Cənubi Koreya və Albaniya üçün də aktualdır. Məlumatda qeyd olunur ki, təbii halda hər 100 qıza qarşılıq 105 oğlan doğulur. Amma bəzi inkişaf etməkdə olan Asiya ölkələrində bu rəqəm süni şəkildə oğlanların xeyrinə dəyişdirilir. Məsələn Çində hər 100 qıza 120-150 oğlan, Gürcüstanda 118, Ermənistanda 120, Azərbaycanda isə 115 oğlan dünyaya gəlir.
Oğlan və qızlar arasında ayrı seçkilik şərq xalqlarının mentalitetinə xasdır. Hətta İslam dininin yaranmasına qədər ərəblər qız uşaqlarını diri-diri torpağa basdırırdılar. İslam dininin yaranması ilə bu məsələyə baxış dəyişdi. Müsəlman dünyasında qıza, qadına önəm verildi, hörmətlə yanaşılmağa başlandı.
Ancaq dünyada sivilizasiya, müasirləşmə, inkişaf baş verməsinə baxmayaraq, hələ də VI - VII əsrlərdə bədəvi ərəblərin yeni doğulan qız uşaqlarını torpağa gömülməsi halı davam edir. Ancaq daha sivil formada. Bu gün də Azərbaycanda hələ dünyaya gəlməmiş qız uşaqlarına \"ölüm fərmanı\" verilir.
Son 20 ildə qız uşaqlarına qarşı \"soyqırımı\" əməliyyatı nəticəsində oğlanlarla qızlar arasındakı balans tamamilə pozulub. Statistik məlumatlar göstərir ki, Azərbaycanda doğulan oğlan uşaqlarının sayı qıza nisbətdə kəskin artıb. Demoqrafik tarazlıq pozulması nəticəsində 2011-ci ilin 3 ayı ərzində 39 min uşaq doğulub. Onlardan 53,8 faizi oğlan, 46.2 faizi qızdır.
Bu rəqəmlər genefondumuza ciddi zərər dəyməsində xəbər verir və artıq ciddi narahatlıqlara səbəb olmaqdadır. Mütəxəssislər gender balansının bu şəkildə pozulmasını demoqrafik problemlərə yol açacağını bildirirlər. Xeyli vaxtdır ki, \"Əhalinin sağlamlığı haqqında\" qanun layihəsinə dəyişiklik etmək, dölün cinsi barədə məlumatların yayılmasına qadağa qoymaq məsələsi gündəmdədir və məsələnin Milli Məclisdə müzakirəsi təklif olunur.
Qeyd edək ki, \"Reproduktiv sağlamlıq və ailə planlaşdırılması haqqında\" qanun layihəsi hamiləliyin ilk 3 ayında həkimlərə belə qadağanı nəzərdə tutur. Hesab olunur ki, bununla gələcəkdə baş verə biləcək gender bərabərsizliyinin qarşısı alına bilər. Ancaq bir çox ekspertlər belə qadağaların elə də ciddi fayda gətirməyəcəyini proqnozlaşdırır. Onların qənaətinə görə, artıq bu sahədə püxtələşən həkimlər \"UZİ\" müayinəsini də, abortu da ev şəraitində həyata keçirməyə başlayacaqlar.
Bəzi mütəxəssislər isə hesab edir ki, problemin qarşısını almaq üçün əhali arasında maarifləndirməyə ehtiyac var. Əgər bu problemin qarşısı alınmazsa 20 - 30 ildən sonra bir qıza təxminən 4 - 5 oğlan düşəcək. Bu isə ciddi disbalans yaradacaq.
USD
EUR
GBP
RUB