Ombudsman Aparatının əməkdaşı Rusiya Beynəlxalq Hüquq Assosiasiyasının illik iclasında iştirak edib

Bu günlərdə Azərbaycan Respublikasının İnsan Hüquqları üzrə Müvəkkili Aparatının şöbə müdiri Zaur Əliyev Moskva şəhərində Rusiya Beynəlxalq Hüquq Assosiasiyasının illik beynəlxalq konfransında Assosiasiyanın üzvü kimi iştirak edib. SİA-nın xəbərinə görə, bu qurumun iclasları ildə bir dəfə keçirilir və beynəlxalq hüququn müxtəlif problemlərinə müzakirə olunur. Builki toplantı beynəlxalq hüququn tətbiqi məsələlərinə həsr olunub.

Konfransda müxtəlif ölkələrdən tanınmış hüquqşünas alimlər, Rusiya Rederasiyasının (RF) nüfuzlu ali təhsil müəssisələrinin -- Moskva Dövlət Beynəlxalq Münasibətlər İnstitutu (MQİMO), RF XİN-in Diplomatik Akademiyası, Moskva Dövlət Hüquq Akademiyası, M.V.Lomonosov adına Moskva Dövlət Universiteti, Rusiya Elmlər Akademiyasının Dövlət və Hüquq İnstitutu, Rusiya Xalqlar Dostluğu Universiteti, Kazan Dövlət Universitetinin professor-müəllim heyəti, beynəlxalq təşkilatların təmsilçiləri, Rusiyanın dövlət qurumlarının nümayəndələri, Dövlət Dumasının deputatları, hakimlər və digər rəsmi şəxslər iştirak edib. Konfransda Azərbaycan Respublikasının İnsan Hüquqları üzrə Müvəkkili Aparatının əməkdaşı Z.Əliyev Vətəndaş və siyasi hüquqlar, həmçinin İqtisadi, sosial və mədəni hüquqlar haqqında beynəlxalq paktların 45 illiyinə həsr olunan "Universal və regional beynəlxalq hüquq müdafiə mexanizmləri: müqayisəli təhlil" mövzusunda çıxış edib. O, çıxışında insan hüquqlarının müdafiəsinin beynəlxalq hüquqi mexanizmləri, BMT-nin hüquq müdafiə mexanizmi, bu sahədə müqavilə və qeyri-müqavilə qurumlarının rolu, İnsan Hüquqları Şurası çərçivəsində həyata keçirilən Universal Dövri İcmal (UDİ) mexanizmi, Azərbaycan Ombudsmanı Elmira Süleymanovanın UDİ üzrə fəaliyyəti və həyata keçirilən tədbirlər, insan hüquqlarının müdafiəsində regional mexanizmlərin, ilk növbədə, Avropa Şurası qurumlarının rolu və bununla bağlı digər məsələlərə toxunub.

Çıxış konfrans iştirakçıları tərəfindən maraqla qarşılanıb, Z.Əliyev ona ünvanlanan sualları cavablandırıb. Eyni zamanda, Azərbaycan Ombudsmanının illik məruzələri, Ermənistanın Azərbaycana qarşı təcavüzü ilə bağlı bəyanatları, azərbaycanlılara qarşı soyqırımı aktlarını əks etdirən disklər, təsisatda hazırlanmış hüquqi nəşrlər konfrans iştirakçılarına təqdim olunub.

Bütün xəbərlər Facebook səhifəmizdə

loading...