Müğənnilərdən fərqli olaraq işlərini planlı şəkildə həyata keçirən aktyorlar gərgin iş rejimlərindən o qədər də şikayətlənmirlər. İlboyu tamaşaçıları müxtəlif janrlı tamaşaları ilə sevindirən sənət adamları vaxt tapanda ya filmə, ya da seriala çəkilir. SİA-nın bu sahədə həmsöbəti Akademik Milli Dram Teatrının aktrisası Vəfa Zeynalova oldu.
Uzun müddətdir ki, başı qalmaqaldan ayılmayan aktrisa sentyabrda - teatr mövsümünün açılışına indidən tədarük gördüyünü söylədi: "Mövsümün açılışına üç ay qalsa da indidən yeni tamaşalar üzərində işləyirik. Elə tamaşalar var ki, hələ teatrın repertuarına yeni daxil olub. Hazırda həmin tamaşaların məşqlərinə başlanacaq. Bundan əlavə yeni filmə dəvət almışam. Yavər Rzayevin ssenarisi və rejissorluğu ilə çəkiləcək film "Müqəddəs heyvan" adlanır. Çəkilişlərə yaxın günlərdə başlanılacaq. Qeyd edim ki, film psixoloji mövzuda olacaq və bu filmdə mən baş rolu ifa edəcəm. Tərəf-müqabilim isə xalq artisti Nurəddin Mehdixanlı olacaq\".
Məlumat üçün bildirək ki, Vəfa, SİA-ya açıqlamasında bir vaxtlar Türkiyədə yeni seriala dəvət olunması barədə məlumat vermişdi. O bildirmişdi ki, həmin serialda tanınmış Hollivud və türk aktyorları ilə eyni filmdə çəkiləcək. Vəfa Zeynalovadan sözügedən serial barədə də öyrəndik. Aktrisa qeyd etdi ki, o, həmin seriala çəkilib, amma bu barədə çox geniş danışmaq istəmir: "Ekran əsəri elə də çoxseriyalı deyil. Amma bu barədə məlumat vermək istəmirəm. Bağladığım müqavilə film haqqında geniş danışmağa imkan vermir. Çünki hələ film Türkiyədə yayımlanmayıb. Mən yalınz onu deyə bilərəm ki, həmin filmdə əsas rollardan birini ifa etmişəm. Sadəcə olaraq, bir az gözləmək lazımdır\". Aktrisa seriala çəkilər-çəkilməz türklər tərəfindən yeni bir filmə dəvət aldığını da gizlətmədi. O, təklifi dəyərləndirsə də, hələ ki, çəkilişlər gecikir. Bunun isə səbəbini maliyyə çatışmazlığı ilə izah edən Vəfa Zeynalova əlavə etdi ki, Türkiyədə filmə külli miqdarda vəsait ayrıldığından güclü sponsor axtarışındadılar. Odur ki, çəkilişlərə nə zaman start veriləcəyi hələ ki, məlum deyil.
Bütün xəbərlər Facebook səhifəmizdə
USD
EUR
GBP
RUB