Aksiyaçılar və polis arasında toqquşma olub 220 nəfər xəsarət alıb

Livanın paytaxtı Beyrutda aksiyaçılar və polis arasında toqquşma baş verib. SİA-nın "Anadolu" agentliyinə istinadən verdiyi məlumata görə, Beyrutda parlament binası qarşısına toplaşan aksiya iştirakçıları yaxınlıqdakı yolları bağlayıb, hökumət əleyhinə şüarlar səsləndiriblər.

Aksiyaçılar polisə daş və yandırıcı maddə dolu butulkalar atıb, polis təzyiqli su şırnağı və gözyaşardıcı qaz tətbiq edib. Toqquşmalar əl-Bürc meydanı və meydanın ətrafında da baş verib. Toqquşmalar nəticəsində ən azı 220 nəfər xəsarət alıb.

Qeyd edək ki, Livanda aksiyalar keçən il oktyabrı 17-dən başlayıb və ilk dəfə polislə toqquşma baş verib. Aksiyalarda ölkədəki iqtisadi durumun yaxşılaşdırılması tələb edilir. Baş Nazir Saad əl-Həriri istefa versə də, ötən dövr ərzində aksiyalar səngiməyib

Müəllif: Ceyhun Rasimoğlu

Bütün xəbərlər Facebook səhifəmizdə