07.07.2021-ci il tarixində BDU-nun Tarix, Beynəlxalq münasibətlər və iqtisadiyyat fakültələrinin təşkilatçılığı ilə “Şuşa bəyannaməsi regionda sülhün və təhlükəsizliyin qarantı kimi” adlı tədbir keçirilib. SİA-nın verdiyi məlumata görə, BDU-nun Tarix fakültəsinin tədris işləri üzrə dekan müavini Bəxtiyar Nəbiyev giriş sözü ilə çıxış edərək Şuşa bəyannaməsinin imzalanması region üçün çox böyük hadisədir. 2021-ci il iyun ayının 15-də Azərbaycan Respublikasının prezidenti cənab İlham Əliyev və qardaş Türkiyə Respublikasının prezidenti Rəcəb Tayyib Ərdoğan arasında Şuşada imzalanmış bəyannamə ölkələrimizin tarixi qardaşlığının, dostluğunun və birliyinin əyani təcəssümüdür.
B.Nəbiyev çıxışına davam edərək bəyannamənin iki ölkə və onun xalqları arasında dostluq və qardaşlığının ölkələrimizin münasibətlərinin keyfiyyətcə yeni müttəfiqlik səviyyəsinə qaldıran xalqlarımızın ümumi mənafelərinə xidmət edəcəyindən bəhs edib. Eyni zamanda bəyannamə Ümummilli Lider Heydər Əliyevin “Bir millət iki dövlət” ifadəsindən irəli gələrək xalqlarımızın birliyini ortaq milli-mənəvi dəyərlərini əks etdirir.
Sonra məruzə ilə çıxış edən millət vəkili, Yeni Azərbaycan Partiyasının idarə heyətinin üzvü Elşad Mirbəşiroğlu bildirib ki, Şuşa Bəyannaməsinin məhz Azərbaycan xalqının Qurtuluş günü - 15 iyun tarixinə və Qarabağ, Zəngəzur üçün çox vacib sayılan Qars müqaviləsinin 100-cü ildönümünə təsadüf etməsinin xüsusi rəmzi mənası var. Biz tarixin təkrarlanmasının və oxşar hadisələrin yenidən baş verməsinin şahidiyik. İndi də bölgə uğrunda ABŞ, Rusiya, Britaniya, Fransa, İran kimi dövlətlərin açıq mübarizəsi müşahidə olunmaqdadır. Lakin bu dəfə fərq ondan ibarətdir ki, hadisələr Azərbaycanın xeyrinə və maraqlarına uyğun cərəyan edir. Təsadüfi deyil ki, Şuşada Türkiyə lideri ilə Bəyannamə imzalayarkən Azərbaycanın dövlət başçısı hər kəsin yadına Qars müqaviləsini saldı. O qeyd etdi: “Tarixi Qars müqaviləsi düz yüz il əvvəl imzalanıb. Bu da böyük rəmzi məna daşıyır. Yüz ildən sonra azad edilmiş Şuşa şəhərində müttəfiqlik haqqında imzalanmış birgə bəyannamə bizim gələcək işbirliyimizin istiqamətini göstərir. Bəyannamədə bir çox önəmli məsələlər öz əksini tapır. Beynəlxalq müstəvidə birgə əməkdaşlıq, fəaliyyətimiz, siyasi əlaqələr, iqtisadi-ticarət əlaqələri, mədəniyyət, təhsil, idman, gənclər siyasəti, demək olar ki, bütün sahələr əhatə olunur. Cənub Qaz Dəhlizinin Türkiyə, Azərbaycan, dünya üçün önəmi göstərilir".
Sonra çıxış edən Bakı Dövlət Universitetinin Diplomatiya və İnteqrasiya kafedrasının müəllimi Soltan Zahidov Şuşa bəyannaməsinin əhəmiyyətindən, onun regionda sülhün və təhlükəsizliyinin qarantı kimi mahiyyətindən bəhs edib.
Tədbirdə yekun nitqlə çıxış edən BDU-nun Humanitar məsələlər və gənclər siyasəti şöbəsinin müdiri Ramin Səmədov bu tədbirin Universitetdə Şuşa Bəyannaməsinin təbliği istiqamətində həyata keçirilən silsilə tədbirlərin davamı olduğunu vurğulayıb, bu istiqamətdə həyata keçiriləcək layihələrdən söz açıb.
Tədbir müəllimlərin və tələbələrin suallarının cavablandırılması ilə davam edib. Tədbirdə 130-dan çox şəxs iştirak edib.
Bütün xəbərlər Facebook səhifəmizdə
.jpg)
USD
EUR
GBP
RUB