Azərbaycan Respublikasının Prezidenti cənab İlham Əliyevin Özbəkistan Respublikasına növbəti dövlət səfəri iki qardaş ölkə arasında münasibətlərin yeni inkişaf mərhələsinə qədəm qoyması baxımından mühüm siyasi hadisə kimi yadda qaldı. Daşkənddə Özbəkistan Prezidenti Şavkat Mirziyoyev ilə görüşdən sonra dövlət başçıları mətbuata bəyanatlarla çıxış etdilər. Prezident İlham Əliyev çıxışında Azərbaycan-Özbəkistan münasibətlərinin yüksək səviyyəsindən, mövcud əməkdaşlığın nəticələrindən və gələcək perspektivlərdən geniş bəhs etdi.
Cənab Prezident İlham Əliyevin bəyanatında iqtisadi əməkdaşlıq xüsusi yer tutdu. Azərbaycan və Özbəkistan arasında ticarət dövriyyəsinin yaxın illərdə 1 milyard ABŞ dollarına çatdırılması istiqamətində konkret hədəflərin müəyyənləşdirildiyi diqqətə çatdırıldı. Dövlət başçısı bildirdi ki, iki ölkə arasında əməkdaşlıq artıq yalnız ticarətlə məhdudlaşmır. Energetika, nəqliyyat, investisiya, turizm, dağ-mədən sənayesi, avtomobil sənayesi, kənd təsərrüfatı, emal və bankçılıq kimi çoxsaylı sahələrdə birgə layihələr həyata keçirilir. Bəyanatın mühüm məqamlarından biri də Azərbaycan və Özbəkistan arasında investisiya əməkdaşlığının genişləndirilməsi ilə bağlı fikirlər oldu. Prezident İlham Əliyev qeyd etdi ki, iki ölkənin qarşılıqlı investisiyaları artıq mühüm nəticələr verməkdədir. Azərbaycan şirkətlərinin Özbəkistanda, Özbəkistan şirkətlərinin isə Azərbaycanda həyata keçirdiyi layihələr iqtisadi əlaqələrin daha da möhkəmlənməsinə xidmət edir. Eyni zamanda, ölkələr arasında neft-qaz kəşfiyyatı sahəsində əməkdaşlığın da yeni mərhələyə keçdiyi bildirildi.
Azərbaycan-Özbəkistan münasibətlərində nəqliyyat və tranzit əməkdaşlığı da xüsusi əhəmiyyət daşıyır. Möhtərəm Prezident çıxışında Trans-Xəzər nəqliyyat dəhlizinin imkanlarının genişləndirilməsinin vacibliyi vurğulandı. Azərbaycan və Özbəkistanın Mərkəzi Asiya ilə Cənubi Qafqaz arasında nəqliyyat və logistika əlaqələrinin inkişafında mühüm rola malik olduğu qeyd edildi. Bu istiqamətdə görüləcək işlər hər iki ölkənin beynəlxalq nəqliyyat və ticarət imkanlarının daha da genişlənməsinə şərait yarada bilər. Ölkə başcısı çıxışında humanitar və mədəni əlaqələrin də Azərbaycan-Özbəkistan münasibətlərinin mühüm hissəsi olduğunu qeyd etdi. Bu baxımdan Nizami Gəncəvi adına Milli Pedaqoji Universitetin Daşkənddə yeni binasının açılması xüsusi əhəmiyyət daşıyır. Həmçinin iki xalqın böyük mütəfəkkirləri Nizami Gəncəvi və Əlişir Nəvainin ədəbi irsinə həsr olunmuş birgə layihələrin həyata keçirilməsi mədəni əlaqələrin daha da dərinləşdirilməsinə xidmət edir.
Bəyanatda Azərbaycanın Qarabağ bölgəsində həyata keçirilən quruculuq işlərində Özbəkistanın iştirakı da yüksək qiymətləndirildi. Cənab İlham Əliyev Özbəkistanın Füzulidə Mirzə Uluqbəy adına məktəbin tikintisinə və Xankəndidə tikiş fabrikinə investisiya yatırmasına toxundu. Bu layihələr iki qardaş ölkə arasındakı həmrəyliyin və qarşılıqlı dəstəyin konkret nümunələri kimi qiymətləndirilə bilər.
Prezident İlham Əliyevin bəyanatında Azərbaycan və Mərkəzi Asiya ölkələri arasında münasibətlərin genişlənməsinin strateji əhəmiyyəti də xüsusi vurğulandı. Dövlət başçısı Azərbaycanla Mərkəzi Asiyanın böyük inkişaf potensialına malik vahid geosiyasi və geoiqtisadi məkan olduğunu bildirdi. Azərbaycanın Mərkəzi Asiya ilə əlaqələrinin gücləndirilməsi ölkəmizin beynəlxalq və regional mövqelərinin daha da möhkəmlənməsinə imkan yaradır. Beləliklə, 23 avqust 2026-cı il tarixində Azərbaycan Prezidenti İlham Əliyevin Özbəkistanda mətbuata verdiyi bəyanat Azərbaycan-Özbəkistan münasibətlərinin strateji xarakterini bir daha nümayiş etdirdi. Səfər çərçivəsində əldə olunan razılaşmalar, imzalanan sənədlər və müəyyənləşdirilən yeni layihələr iki qardaş ölkə arasında siyasi, iqtisadi, nəqliyyat, enerji, humanitar və mədəni əlaqələrin daha da inkişaf etdirilməsi üçün möhkəm zəmin yaradır. Bu səfər Azərbaycan və Özbəkistanın qarşılıqlı etimad və qardaşlıq prinsiplərinə əsaslanan münasibətlərinin gələcəkdə də yüksələn xətt üzrə inkişaf edəcəyinə əminlik yaradır.
Nazim Bünyatov,
YAP Ağcabədi rayon təşkilatının sədr müavini
Bütün xəbərlər Facebook səhifəmizdə
.jpg)
.jpg)
-_amerika_-_rakurs_-_v.veliyev452.png)
USD
EUR
GBP
RUB