"Azərbaycan millisi ilə oyunda topa daha çox sahib olacağıq" - Avstriyalı futbolçu

"Hər iki matçda rəqiblərimizdən daha çox topa sahib olacağıq. Amma bundan faydalanmaq da vacibdir". SİA xəbər verir ki, bunu Avstriya millisinin futbolçusu Qernot Trauner AVRO-2024-ün seçmə mərhələsində Azərbaycan və Estoniya yığmalarına qarşı keçirəcəkləri oyunlardan əvvəl "Volksblatt" nəşrinə müsahibəsində deyib.

31 yaşlı müdafiəçi rəqiblərlə yaxından maraqlandıqlarını bildirib: "Biz onların heyətlərinə nəzər yetirmişik. Məsələn, Azərbaycan millisindən Ozan Can Kökçü mənim "Feyenoord"dakı (Niderland) komanda yoldaşım Orkunun qardaşıdır".

Təcrübəli oyunçu iki görüşdə də meydana çıxmağa hazır olduğunu söyləyib: "Bu qarşılaşmalarda qələbə qazanmaq yaxşı başlanğıc olardı. AVRO-2024-ün final mərhələsinə yüksəlməyi hədəfləyirik".

Qeyd edək ki, Avstriya yığması martın 24-də Azərbaycan, 27-də isə Estoniya millisini qəbul edəcək. Hər iki görüş Linz şəhərindəki “Raiffeisen Arena”da keçiriləcək.

Bütün xəbərlər Facebook səhifəmizdə