Mikayıl Cabbarov: Dövlət biznes krediti faizlərinin ödənilməsinə dəstək verəcək

İndiki böhranın unikallığı ondan ibarətdir ki, bu, heç bir nəzəriyyədə, dərslikdə bəhs edilən iqtisadi böhran deyil.

SİA xəbər verir ki, bunu Azərbaycan Televiziyasında (AzTV) "Hədəf" verilişinin qonağı olan İqtisadiyyat naziri Mikayıl Cabbarov deyib.

Onun sözlərinə görə, qeyri-müəyyənlik elementi belə bir dönəmdə verilən qərarların sürət və keyfiyyətini ön plana çıxarır:

"Biz iqtisadiyyatımızı sağlam, dayanıqlı və rəqabətədavamlı bir iqtisadiyyat kimi görmək istəyirik. Biz dar günündə dövlətinə söykənmək üçün mənəvi haqqı olan, gündəlik fəaliyyətində yüksək sosial-korporativ hissini qoruyan bir iqtisadiyyatı görmək istəyirik. Biz növbəti günlər və həftələr ərzində koronavirus pandemiyasının iqtisadiyyata mümkün təsirlərini aradan qaldırmağa istiqamətlənmiş proqramların son dizaynını həm həmkar qurumlarla, həm də özəl sektorun nümayəndələri ilə bəlli bir son nəticəyə gətirəcəyik. Cənab Prezidentin bizə verdiyi tapşırıq ondan ibarət idi ki, biz iqtisadiyyata dəstək proqramını 1 milyard manatla məhdudlaşdırmayaraq daha geniş bir proqram şəklinə gətirə bilək"

M.Cabbarov iki yeni təklif olunan proqramın üstündə xüsusilə dayanıb:

"Bunlardan birincisi olaraq qarşımıza çıxan 1 miyard manatlıq proqram mövcud kredit portfelinin dəstək proqramıdır. Məlumdur ki, bir sıra sahibkarlarımızın bank kreditləri var. Biz bu kreditlerin elementlərini digər həmkar subyektlərlə birgə müəyyənləşdirəcəyik. Əsas hədəfimiz biznes kreditləridir. Ola bilsin ki, sözügedən proqram çərçivəsində müəyyən həcm istehlak kreditlərinin dəstəyinə də ayrılsın. Əsas parametrləri özümüz üçün müəyyənləşdirmişik. Dövlət bu proqram çərçivəsində xüsusi meyarlara cavab verən kreditlərin faizlərinin ödənməsində faiz dərəcəsinin yükünü 10 faizə qədər endirə bilər. Dövlət Sahibkarlığa Yardım Milli Fondu vasitəsilə həmin faizlərin ödənilməsinə dəstək verəcək. İkinci proqramımızda kreditlərə dövlətin dəstəyi və kredit məbləğinin 60 faizinə qədər dövlət zəmanəti ilə təmin edilməsi, faizlərin müəyyən həddə qədər ödənilməsi nəzərdə tutulur. Biz belə kreditlərin illik faizinin 15 faizi keçməməli olduğunu düşünürük. Həmin 15 faizin yarısının ödənişini Sahibkarlığa Yardım Milli Fondu öz üzərinə götürə bilər"

Bütün xəbərlər Facebook səhifəmizdə

loading...