Yeni Azərbaycan Partiyası (YAP) Cənubi Qafqazda ən böyük və nüfuzlu siyasi təşkilat olaraq formalaşıb və hazırda bu statusunu qoruyur. Partiyanın yaranma tarixi, liderləri və ölkənin siyasi həyatında oynadığı rol bu təşkilatı regionda misilsiz edən əsas faktorlar arasında yer alır.
1990-cı illərin əvvəllərində Azərbaycan fəlakət həddində idi, ölkəmizdə hərc-mərclik hökm sürürdü, müstəqil dövlətin dayaqlarını möhkəmləndirəcək heç bir addım atılmırdı. 1992-ci il oktyabrın 16-da müasir Azərbaycanın tarixində mühüm əhəmiyyət kəsb edən hadisə ilə yadda qaldı. Məhz həmin tarixdə bir qrup ziyalı Naxçıvan Muxtar Respublikası Ali Məclisinin sədri Heydər Əliyevə müraciət edərək, Yeni Azərbaycan Partiyasının yaradılması ideyasına münasibət bildirməyi və bu partiyaya rəhbərlik etməyi xahiş etdilər. Müraciəti imzalayan ziyalılar bütün bu təhlükələri görür və getdikcə vəziyyətin daha da ağırlaşacağını, illərlə həsrətində olduğumuz müstəqilliyimizin yenidən itirilməsi təhlükəsini görürdülər.
Yeni Azərbaycan Partiyasının təsis konfransı 21 noyabr 1992-ci il tarixində Naxçıvanda ölkəmizin bütün regionlarını təmsil edən və 550 nəfərdən ibarət olan təşəbbüs qrupunun iştirakı ilə keçirilmişdir. Partiyanın yaranması, Ulu Öndər Heydər Əliyevin rəhbərliyi ilə ölkənin siyasi müstəvisində sabitlik və inkişafı təmin etmək üçün vacib addım idi. Bu dövrdə Ümummilli Liderin siyasi təcrübəsi və idarəçilik bacarığı geniş ictimai dəstəyə səbəb oldu və YAP-ın qısa müddətdə cəmiyyətin aparıcı qüvvəsinə çevrilməsini təmin etdi.
YAP-ın fəaliyyəti dövründə Azərbaycan sürətli iqtisadi inkişaf və modernləşmə dövrü yaşadı. Neft strategiyasının həyata keçirilməsi, xarici sərmayələrin cəlb edilməsi və iqtisadi diversifikasiya partiyanın ölkənin iqtisadi sisteminə gətirdiyi mühüm töhfələrdəndir. Heydər Əliyevin siyasi kursunu layiqincə davam etdirən cənab İlham Əliyevin fəaliyyəti dövründə Yeni Azərbaycan Partiyası, ölkənin beynəlxalq aləmdə nüfuzunu artırmaq və sosial rifahı yaxşılaşdırmaq üçün fəaliyyətini daha da genişləndirdi.
Cənubi Qafqazda öz siyasi təsir dairəsi və nüfuzu ilə fərqlənən Yeni Azərbaycan Partiyasının fəaliyyət proqramı, sosial və iqtisadi islahatlar, milli maraqların müdafiəsi və dövlətçiliyin möhkəmləndirilməsi istiqamətində konkret nəticələr əldə etməyə yönəlmişdir. Bu müddət ərzində YAP-ın təşkilati strukturu güclənmiş, partiyanın ideologiyası isə daha geniş kütlələri əhatə etməyi və xalqın etimadını qazanmağı bacarmışdır.
Yeni Azərbaycan Partiyası Vətən müharibəsi zamanı milli birliyi və dövlətçiliyi möhkəmləndirmək istiqamətində mühüm işlər görmüşdür. 2020-ci ilin 27 sentyabrında başlanan 44 günlük İkinci Qarabağ müharibəsi, ölkəmizin ərazi bütövlüyünü bərpa etməyə yönəlmiş mühüm bir hərbi əməliyyat idi və YAP, bu mübarizədə böyük siyasi və ideoloji dəstək göstərdi. Müharibənin nəticələri və Azərbaycanın ərazi bütövlüyünün bərpası, YAP-ın siyasi mövqeyini möhkəmləndirdi və partiya xalqın gözündə daha nüfuzlu bir siyasi qüvvə olaraq tanındı. Partiya, postmüharibə dövründə də Azərbaycanın güclənməsi və inkişafı üçün yeni layihələr hazırlamaqla uğurlu fəaliyyətini davam etdirdi.
Yeni Azərbaycan Partiyasının 5 mart 2021-ci il tarixli VII qurultayı partiyanın fəaliyyətində, strukturunda, hədəflərində və idarəetmə sistemində mühüm dəyişikliklərə səbəb oldu. YAP Sədrinin birinci müavini postu təsis olundu və bu vəzifəyə Azərbaycanın Respublikasının birinci vitse-prezidenti Mehriban Əliyeva təyin olundu. Bu, partiyanın idarəetmə strukturunun gücləndirilməsi və səmərəliliyinin artırılması məqsədini daşıyırdı.
Yeni Azərbaycan Partiyasının yeni proqramı hazırlanmış və 29 dekabr 2021-ci il tarixində partiyanın İdarə Heyətinin qərarı ilə təsdiq edilmişdir. Bu proqram, Ulu Öndər Heydər Əliyevin müəyyənləşdirdiyi təməl prinsiplərə əsaslanaraq hazırlanmış və Azərbaycanın gələcək inkişafı üçün strateji sənəd olaraq qəbul edilmişdir. Proqramın məqsədi, ölkənin qarşısında duran yeni hədəfləri müəyyən etmək və həyata keçirməkdir.
VII qurultay, partiyanın gələcək fəaliyyətinə yön vermək və ölkənin siyasi həyatında daha da güclü mövqeyə sahib olmaq üçün əhəmiyyətli bir addım idi. Bu dəyişikliklər, həmçinin partiyanın xalq arasında daha geniş dəstək qazanmasına xidmət etmişdir.
Nurlan Həsənov
Milli Məclisin deputatı
Bütün xəbərlər Facebook səhifəmizdə
USD
EUR
GBP
RUB