"Cənab Prezidentin nəzarətində olan regionların sosial-iqtisadi inkişafı layihəsi uğurla icra olunur". Bu sözləri SİA-ya açıqlamasında Vüqar İskəndərov deyib.
Deputat bildirib ki, ölkə başçısı mütəmadi olaraq bölgələrə səfərlər edir, görülən işlərlə tanış olur və yeni istifadəyə verilmiş obyektlərin açılışını edir: "Tikilmiş obyektlərin bünövrəsini qoyur, xüsusi tapşırıqlarını verir və ümumi olaraq ölkəmizin hər yerində iqtisadi-sosial, digər islahatlar davam edir. O cümlədən, regionlarda müvafiq həm dövlət, həm özəl sektor vasitəsilə genişmiqyaslı layihələr icra olunur. Ölkə başçısının Hacıqabul rayonuna səfəri və burada ölkənin ən böyük layihələrdən biri olan Şirvan su kanalının tikintisi ilə bağlı görülən işlərlə tanış olması, bu kanalın əhəmiyyəti barədə fikirlər söyləməsi, ölkəmizdə aparılan abadlıq, quruculuq işləri ilə bağlı olan fikirlər söyləməsi, Şirvan su kanalının hal-hazırda məcrasının genişləndirilməsi, çox böyük ərazini əhatə etməsi, onlarla şəhər və rayonun suvarılmasında uğurla istifadə olunacağı, bu vasitə ilə yaxın zamanda aqrar sahədə uğurlar əldə edə biləcəyimizi göstərir".
"Bilirik ki, ermənilər yalnız torpaqlarımızı işğal etməklə vandallıq etməmiş, həm də eyni anda bizim ekologiyaya, təbii sərvətlərimizə də çox böyük ziyan vurmuşlar. Hal-hazırda işğaldan azad olunmuş ərazilərdə Qarabağ və Şərqi Zəngəzur iqtisadi rayonlarında su ehtiyatlarımız 20%-dən yuxarını təşkil edir. Biz artıq onları əldə etməklə həm suvarma, həm də içməli su ilə bağlı ehtiyaclarımızın ödənilməsində önəmli rol oynayacağını da bilirik. Bunun üçün də ölkə başçısının tapşırığı ilə həmin ərazilərdə çox böyük işlər görülür. Ümumiyyətlə, geniş aspektdə baxsaq, gələcəkdə dünyada şirin su ilə bağlı çox böyük problemlərin olacağı qeyd edilir. Ölkəmiz də indidən preventiv məsələlərin görülməsini təmin etməyə başlayıb. Cənab Prezidentin qeyd etdiyi kimi Xəzər dənizinin suyunun şirin suya çevrilməsi prosesi də gələcəkdə baş tutacaq. Bu, həm suvarma, həm də içməli su ilə bağlı çox böyük fayda verəcək.
Digər məsələ Qarabağ kanalının istifadəyə verilməsidir ki, həmin ərazilərimizi, ölkəmizin su ehtiyatlarına müsbət təsirini göstərəcək. Ümumi götürsək, Prezidentin hər bir səfəri ölkə iqtisadiyyatının və digər sahələrin inkişafı üçün önəmli rol oynayır. Cənab İlham Əliyevin Hacıqabul rayonuna səfəri də dediklərimizə bariz nümunədir" - deyə o, əlavə edib.
Bütün xəbərlər Facebook səhifəmizdə
USD
EUR
GBP
RUB