Ənənəvi müxalifət düşərgəsi bir böhrandan çıxmamış, digər böhranla qarşı-qarşıya qalmaqdadır. Belə ki, "Milli Şura"da təmsil olunan AXCP və Müsavat Partiyası arasında soyuq küləklərin əsdiyi bir vaxtda "cəbhəçilər" tərəfindən İctimai Palatanın (İP) buraxılması şərtinin irəli sürülməsi mövcud vəziyyəti daha da çıxılmaz duruma doğru sürükləyir. Məsələ ondadır ki, bugünlərdə mətbuata açıqlama verən AXCP sədrinin müavini Fuad Qəhrəmanlı İctimai Palatanın öz funksiyasını başa vurduğunu, nəticədə fəaliyyətsiz bir quruma çevrildiyini bəyan edib.
Daha dəqiq desək, Müsavat Partiyasından fərqli olaraq, İctimai Palata ilə bağlı artıq AXCP-nin yekun qərarı bəlli olub. F.Qəhrəmanlı bir çox əsasları ön görərək, qurumun bundan sonrakı fəaliyyətinin səmərə verməyəcəyini bildirib: "Milli Şura yarandıqdan sonra "İctimai Palata"nın sessiyası keçirilməyib. Bu müddətdə İctimai Palatanın Koordinasiya Şurası səviyyəsində ara-sıra görüşlər reallaşıb. Ümumi rəy də bundan ibarətdir ki, indiki halda Milli Şura daha təkmil birlik mexanizmi kimi önəmlidir".
AXCP sədrinin müavini Fuad Qəhrəmanlı: "İctimai Palata buraxılmalıdır"
Beləliklə, "İctimai Palata isə öz missiyasını və funksiyasını artıq başa çatdırıb" - deyə bildirən cəbhə sədrinin müavini qeyd edib ki, məhz bu səbəbdən, İctimai Palata buraxılmalıdır. Nəticədə irəli sürülən görə, müxalifətin (xüsusilə, AXCP və Müsavat partiyalarının – R.N.) eyni vaxtda iki birlikdə təmsil olunmasını səmərəsiz hesab etdiyini bildirən F.Qəhrəmanlı belə hesab edir ki, yaxın vaxtlarda bu qurumun buraxılması ilə bağlı qərar veriləcək: "Çünki İctimai Palata faktiki olaraq, formal fəaliyyət göstərən quruma çevrilib".
Lakin yuxarıda da qeyd etdiyimiz kimi, həm Müsavat Partiyası, həm də bu partiyaya yaxınlıqları ilə seçilən tərəflər AXCP-nin iddialarına qarşı əks-arqumentlərlə çıxış edirlər.
"İctimai Palata o zaman rəsmən buraxıla bilər ki, Milli Şura ondan üstünlüyünü sübut edə bilsin"
Məsələn, İctimai Palatanın Koordinasiya Şurasının üzvü, Müsavat Partiyasına yaxınlığı ilə seçilən Vidadi Mirkamal AXCP-nin mövqeyinə əks olaraq düşünür ki, İctimai Palata heç də Milli Şuradan az fəaliyyət göstərmir: "Üç il ərzində İctimai Palata çox normal fəaliyyət göstərib. Milli Şura yaradılandan sonra İctimai Palatada fəaliyyət bir qədər səngidi. Buna da təbii baxmaq lazım idi. Çünki İctimai Palatadakı qurumlar, şəxslərin çoxu "Milli Şura"da təmsil olundular. Amma İctimai Palata buraxılmadı və buraxılmayıb. İctimai Palata o zaman rəsmən buraxıla bilər ki, Milli Şura ondan üstünlüyünü sübut edə bilsin, həya qabiliyyətli bir orqana çevrilə bilsin. Hələ ki Milli Şura buna nail ola bilməyib. Milli Şuranın hətta yerlərdə şöbələri yoxdur. Milli Şura təşkilati baxımdan hələ ki lazımi səviyyədə formalaşa bilməyib. Hazırkı vəziyyətdə İctimai Palata lazımdır. İctimai Palata o halda buraxıla bilər ki, Milli Şura tam formalaşsın, yerli təşkilatları yaradılsın".
Göründüyü kimi, düşərgədə mövcud olan ziddiyyətli fikirlər də belə qənaətə gəlməyə kifayət qədər zəmin yaradır ki, istər AXCP-Müsavatın soyuq münasibətlərində, istərsə də digər qarşıdurmalarda haçalanan fikirlər ənənəvi müxalifət xəmirinin çox su aparacağını təsdiq edir. Bu səbəbdən, istər sözügedən mövzuda, istərsə də digər bu kimi məsələlərdə mövcud olmayan yekdil rəy qarşıdurmaların daha şiddətli müstəviyə keçid alacağından xəbər verir.
USD
EUR
GBP
RUB