Ermənistanda eks-prezident Robert Köçəryanın hazırkı prezident Serj Sarkisyanı devirərək hakimiyyətə qayıtmaq yönündə fəaliyyətlərini gücləndirdiyi haqda xəbərlər öz təsdiqini tapmaqdadır. Belə ki, Ermənistan mətbuatı Köçəryanın hələ 8 may tarixində - Şuşanın işğal olunmasını qeyd etmək üçün Dağlıq Qarabağda olarkən, separatçı rejimin nəzarətindəki silahlı qüvvələrin komandanlığı ilə Sarkisyanın hakimiyyətdən devrilməsi planını müzakirə etdiyi barədə xəbərlər yaymışdılar.
Həmin xəbərlərdə bildirilirdi ki, Dağlıq Qarabağın keçmiş "müdafiə
naziri" Samvel Babayan Köçəryanın əsas müttəfiqlərindən biridir və
eks-prezidentin "sağ əli" rolunu oynayır. Xəbər mənbələrində o da
bildirilmişdir ki, Köçəryan Sarkisyanı devirmək üçün Dağlıq Qarabağda ona sadiq
qüvvələri birbaşa paytaxt Yerevana yeridə bilər. Xatırladaq ki, hələ 1998-ci
ildə Köçəryan o vaxtkı prezident Levon Ter-Petrosyanı istefaya məcbur etmək
üçün məhz bu üsuldan istifadə etmişdi.
Əldə edilən digər məlumatlara görə, Köçəryan hakimiyyətə qayıtmaq planlarını çox
gizli şəkildə razılaşdırır və bu razılaşdırmalarda xarici dövlət amillərinin
mövcudluğu artıq öz təsdiqini tapıb. O da məlum olub ki, bu günlərdə S.Babayan
Tehranda gizli səfərdə olub. Bu barədə məlumat mətbuatda yayıldıqdan sonra
İrana getdiyini təsdiqləyən Babayan deyib ki, o, Ermənistanın daxili siyasətinə
dair heç kimlə müzakirə aparmayıb. Mətbuatın iddiasına görə, Köçəryan vəd edib
ki, əgər hakimiyyətə yiyələnməyi bacarsa Babayana Ermənistanın müdafiə naziri
postunu verəcək.
Ermənistan mətbuatı xatırladır ki, bu ilin yanvar ayında Köçəryan da Tehranda
səfərdə olub və orada bəzi rəsmilərlə görüşüb. Qarşı tərəf isə bəyan edib ki, Köçəryanla "köhnə dost" kimi
keçmiş haqda "xoş xatirələr" və gələcək barədə "perspektivlər" müzakirə olunub.
Bir daha xatırlatmaq yerinə düşərdi ki, Babayan və Köçəryan hər ikisi əslən Dağlıq
Qarabağdandır. Babayan 1993-1999-cu illərdə separatçı rejimin silahlı
qüvvələrinin "komandanı" olub. Daha sonra o, Dağlıq Qarabağda qondarma
"prezident" Arkadi Qukasyanı devirmək cəhdinə görə həbs edilib. Babayanın
Ermənistan prezidenti Serj Sarkisyan və indiki müdafiə naziri Seyran Ohanyanla
münasibətləri olduqca pisdir. Onun həbsdən buraxılaraq Ermənistana qayıtmasını
isə Robert Köçəryan səlahiyyət müddətinin başa çatmasına az qalmış təmin edib. Bildirilir
ki, Dağlıq Qarabağdakı erməni qüvvələrinin bir hissəsi hələ də Babayanın
müəyyən təsiri altında qalmaqdadır.
Lakin istənilən halda, Ermənistanın
qarışması və əsas siyasi qüvvələrin bir-birinə qarşı savaşa başlaması
Azərbaycanın xeyrinədir. Hazırda Qərbin Türkiyəyə təzyiq edərək, onu
Ermənistanla sərhədlərini açmağa təhrik etməsi fonunda İrəvanda vəziyyət
qarışsa, belə bir prosesin təxirə salınacağı şübhəsizdir. Bu vəziyyət həm də
erməniləri daha da zəiflədər, Dağlıq Qarabağ və Ermənistan erməniləri arasında
olan konflikti qəti şəkildə dərinləşdirərdi.
RÖVŞƏN
Bütün xəbərlər Facebook səhifəmizdə
USD
EUR
GBP
RUB