Amerika Birləşmiş Ştatlarının yeni seçilmiş prezidenti Donald Tramp vəzifəsini qəbul etdikdən sonra ölkəsinə Meksika və Kanadadan gələn bütün məhsullara 25 faiz, Çindən gətirilənlərə isə əlavə 10 faiz gömrük rüsumu tətbiq edəcəyini elan edib.
SİA xəbər verir ki, Tramp sosial media platforması “Truth Social”da sərhəd təhlükəsizliyini təmin etmək və ölkəyə əsasən fentanil olmaqla narkotik maddələrin gəlişini dayandırmaq məqsədilə Meksika, Kanada və Çinə tətbiq edəcəyi tariflərlə bağlı məlumat verib.
Meksika və Kanada üzərindən keçərək daha əvvəl görülməmiş səviyyələrdə narkotik maddə gətirən minlərlə cinayətkar insanın olduğunu vurğulayan Tramp Meksikadan gələn və minlərlə insandan ibarət olan bir karvanın hazırda açıq olan ABŞ sərhədindən keçmək istəyinin dayandırıla bilməz göründüyünü bildirib.
O, "20 yanvarda ilk fərmanlarımdan biri kimi Meksika və Kanadadan ABŞ-a gələn bütün məhsullara və absurd açıq sərhədlərinə 25 faizlik tarif tətbiq etmək üçün bütün zəruri sənədləri imzalayacağam. Bu tarif əsasən fentanil olmaqla narkotik maddələr və bütün qanunsuz xaricilərin ölkəmizə axını dayanmayana qədər qüvvədə qalacaqdır" ifadələrini işlədib.
Meksika və Kanadanın uzun müddətdir davam edən bu problemi asanlıqla həll etmək üçün tam hüquq və səlahiyyətə malik olduğunu bildirən yeni prezident "Onlardan bu gücü istifadə etmələrini tələb edirik. Əks halda çox böyük bir qarşılıq ödəməklərinin vaxtı gəlib çatmışdır" deyə əlavə edib.
Donald Tramp Çinlə, əsasən fentanil olmaqla, ABŞ-a göndərilən böyük miqdarda narkotik maddələr haqqında bir çox müzakirələr apardığını bildirərək deyib: "Çin nümayəndələri mənə bu işi görərkən tutulan narkotik satıcılarına ən ağır cəzanı, yəni ölüm cəzasını tətbiq edəcəklərini dedilər. Amma təəssüf ki, bunu heç vaxt etmədilər və narkotik maddələr əksər hallarda Meksika üzərindən daha əvvəl görünməmiş səviyyələrdə ölkəmizə gəlir. Bunu dayandırana qədər Çin məhsullarına tariflərə əlavə olaraq 10 faiz gömrük rüsumu tətbiq edəcəyik."
Bütün xəbərlər Facebook səhifəmizdə
USD
EUR
GBP
RUB