Azərbaycanın siyasi və beynəlxalq diplomatiya platformasında baş verən son mühüm hadisələr ölkənin həm daxili dövlət quruculuğunda, həm də qlobal müstəvidə tutduğu strateji mövqeyi aydın şəkildə nümayiş etdirir. Yeni Azərbaycan Partiyasının VIII Qurultayı ölkənin aparıcı siyasi qüvvəsinin gələcək inkişaf prioritetlərini, ideoloji bazasını və suverenliyin tam bərpasından sonra yaranmış yeni geosiyasi reallıqlara uyğunlaşma strategiyasını müəyyən etdi.
Bu sözləri SİA-ya deputat Kamran Bayramov deyib.
O bildirib ki, Qurultayda qəbul olunan qərarlar, ideoloji yenilənmə və təşkilati strukturun təkmilləşdirilməsi göstərir ki, YAP təkcə keçmişin zəfərlərini qoruyan deyil, həm də Böyük Qayıdış proqramının uğurla icrası və milli həmrəyliyin daha da möhkəmləndirilməsi üçün yeni hədəflər müəyyən edən dinamik bir institutdur. Prezident İlham Əliyevin qurultaydakı nitqi ölkənin siyasi sisteminin dayanıqlılığını, milli maraqların sarsılmazlığını və daxili sabitliyin inkişafın təməl şərti olduğunu bir daha sübut etdi. Daxili siyasi müstəvidə formalaşan bu möhkəm birlik və institusional güc Azərbaycanın beynəlxalq aləmdə özünü daha inamlı, sülhyaradıcı və dialoqyönümlü mərkəz kimi təqdim etməsinə birbaşa zəmin yaradır:
“Bu kontekstdə Bakıda keçirilən VII Ümumdünya Mədəniyyətlərarası Dialoq Forumu və Prezident İlham Əliyevin həmin forumdakı konseptual çıxışı daxili siyasi uğurların xarici siyasət strategiyası ilə harmonik vəhdətini nümayiş etdirir. Dövlət başçısı forumdakı nitqində qlobal səviyyədə artan parçalanma, etnik-dini münaqişələr və ksenofobiya fonunda Azərbaycanın sivilizasiyalararası körpü rolunu, multikulturalizm təcrübəsini və sülh təşəbbüslərini vurğulayaraq, beynəlxalq aləmə aydın humanist mesajlar ünvanladı. VIII Qurultayda vurğulanan milli suverenlik, ərazi bütövlüyü və güc konsepsiyası VII Mədəniyyətlərarası Dialoq Forumunda sülhün, əməkdaşlığın və qarşılıqlı hörmətin təşviqi ilə tamamlanır. Yəni daxildə siyasi iradəsi, milli birliyi və güclü dövlətçilik institutu olan Azərbaycan, xaricdə də beynəlxalq hüquqa, ədalətə və sivilizasiyalararası dialoqa söykənən qlobal gündəliyin formalaşmasında fəal iştirak edir.
Beləliklə, hər iki mühüm tədbir vahid bir dövlətçilik xəttinin iki ayrılmaz tərəfini təşkil edir. YAP-ın VIII Qurultayı ölkə daxilində güclü idarəetməni, ideoloji birliyi və inkişafın yeni mərhələsini təmin etdiyi halda, VII Ümumdünya Mədəniyyətlərarası Dialoq Forumu Azərbaycanın bu gücə söykənərək dünyada dialoq, sülh və birgəyaşayış dəyərlərini təbliğ edən nüfuzlu qlobal aktor olduğunu bir daha təsdiqləyir”.
Ayşən Vəli
Bütün xəbərlər Facebook səhifəmizdə
USD
EUR
GBP
RUB
