"Prezident İlham Əliyevin Ərəb Koordinasiya Qrupuna daxil olan üzv qurumların rəhbər şəxslərindən ibarət nümayəndə heyətini qəbul etməsi Azərbaycanın beynəlxalq maliyyə və iqtisadi əməkdaşlıq siyasətində artan rolunu göstərən mühüm hadisə kimi qiymətləndirilə bilər".
Bunu SİA-ya açıqlamasında politoloq Rəşad Bayramov deyib.
_(1)_(1)_(1)_(1)_(1).jpg)
Onun sözlərinə görə, bu görüş Azərbaycanın ərəb ölkələri və İslam dünyasının maliyyə institutları ilə münasibətlərinin strateji xarakter daşıdığını nümayiş etdirir:
"Ərəb Koordinasiya Qrupu müxtəlif inkişaf maliyyə institutlarını bir araya gətirən mühüm platformalardan biridir. Bu qurumlar əsasən inkişaf layihələrinin maliyyələşdirilməsi, infrastrukturun qurulması, sosial-iqtisadi proqramların dəstəklənməsi və davamlı inkişaf təşəbbüslərinin həyata keçirilməsində rol oynayır. Belə bir nümayəndə heyətinin Azərbaycana səfəri ölkənin iqtisadi potensialına və həyata keçirdiyi layihələrə beynəlxalq maliyyə dairələrində olan marağın göstəricisidir.
Azərbaycan son illərdə özünü yalnız enerji ixrac edən ölkə kimi deyil, həm də regional iqtisadi əməkdaşlıq və investisiya məkanı kimi təqdim etməyə nail olub. Ölkədə həyata keçirilən infrastruktur layihələri, nəqliyyat dəhlizlərinin inkişafı, qeyri-neft sektorunun genişləndirilməsi və bərpa-quruculuq proqramları xarici maliyyə institutları üçün yeni əməkdaşlıq imkanları yaradır. Xüsusilə Qarabağ və Şərqi Zəngəzurda həyata keçirilən layihələr həm iqtisadi, həm də humanitar baxımdan böyük əhəmiyyət daşıyır.
Bu görüşdə diqqət çəkən əsas məsələlərdən biri Azərbaycanın yaşıl enerji və dayanıqlı inkişaf istiqamətində prioritetlərinin beynəlxalq tərəfdaşlarla müzakirə olunmasıdır. Qlobal iqtisadiyyat enerji keçidi mərhələsindən keçdiyi bir dövrdə bərpa olunan enerji mənbələri, enerji səmərəliliyi və ekoloji layihələr getdikcə daha çox investisiya cəlb edir. Azərbaycanın günəş və külək enerjisi potensialı, xüsusilə azad edilmiş ərazilərdə yaradılan “yaşıl enerji” konsepsiyası ərəb maliyyə institutları üçün də əməkdaşlıq sahələri yarada bilər.
Digər mühüm istiqamət nəqliyyat və logistika sahəsidir. Azərbaycanın Şərq-Qərb və Şimal-Cənub marşrutları üzərində yerləşməsi onu Avrasiya məkanında strateji tranzit ölkəyə çevirir. Ərəb maliyyə qurumları ilə əməkdaşlıq bu sahədə yeni layihələrin maliyyələşdirilməsi, regional bağlantıların gücləndirilməsi və ticarət imkanlarının genişləndirilməsi baxımından əhəmiyyətlidir.
Bu görüş Azərbaycanın ərəb dünyası ilə münasibətlərinin həm siyasi, həm də iqtisadi və investisiya əsaslı inkişaf etdiyini də göstərir. Ümumilikdə isə Ərəb Koordinasiya Qrupu nümayəndə heyətinin qəbulu Azərbaycanın qlobal iqtisadi əlaqələr sistemində mövqeyinin gücləndiyini göstərən hadisələrdən biridir. Bu əməkdaşlıq gələcəkdə enerji, nəqliyyat, infrastruktur, bərpa-quruculuq və qeyri-neft sektorunda yeni imkanların yaranmasına, Azərbaycanın isə regionda iqtisadi inteqrasiya proseslərində daha fəal rol oynamasına şərait yarada bilər".
Bütün xəbərlər Facebook səhifəmizdə
.jpg)
USD
EUR
GBP
RUB