“Azərbaycan Prezidenti cənab İlham Əliyevin həyata keçirdiyi uğurlu xarici siyasətin nəticəsi olaraq, ölkəmiz dünyada etibarlı tərəfdaşlardan biri kimi qəbul edilir. Əksər dövlətlər Azərbaycanla müasir dünya trendlərinə uyğun olaraq daha sıx əməkdaşlıqda maraqlıdırlar”. Bu sözləri SİA-ya açıqlamasında siyasi şərhçi Elşad Məmmədli deyib.
Elşad Məmmədli sözlərinə belə davam edib: “Azərbaycan Respublikası ilə Birləşmiş Ərəb Əmirlikləri arasında da çox sıx siyasi, iqtisadi, ticari, mədəni əlaqələr mövcuddur və yüksələn xətlə inkişaf edir.
Öncə ona diqqət yetirək ki, BƏƏ bərabər təmsil olunduğumuz bütün qlobal platformalarda Azərbaycanı dəstəkləyir, müdafiə edir. Birləşmiş Millətlər Təşkilatı və İslam Əməkdaşlıq Təşkilatı çərçivəsində dərin münasibətləri xüsusi qeyd edə bilərik.
O da məlumdur ki, BƏƏ ilə Azərbaycan “yaşıl enerji” sahəsində də mühüm tərəfdaşdırlar. Bütün bunların fonunda Azərbaycan-BƏƏ əməkdaşlığının daha da dərinləşməsi, münasibətlərin dinamik inkişafı təbiidir. Qeyd etdiyim kimi, bu, məhz İlham Əliyevin uğurlu xarici siyasət kursunun nəticələrindən biridir. Bu kontekstdə yanvarın 13-də Azərbaycan Prezidentinin BƏƏ-yə işgüzar səfəri də olduqca mühümdür.
Əbu-Dabidə Azərbaycan Prezidenti İlham Əliyevin Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan ilə görüşündə BƏƏ-nin COP29-da iştirakını bir daha yüksək qiymətləndirməsi də təsadüfi deyildi. Prezidentin qeyd etdiyi kimi, Azərbaycan-BƏƏ münasibətləri strateji tərəfdaşlıq xarakteri daşıyır. Həmçinin, siyasi münasibətlərimizin mükəmməl səviyyədə olduğunu da Prezident İlham Əliyev xüsusi vurğulayıb.
O, iqtisadi-ticari əlaqələrin genişləndiyini qeyd edib, Birləşmiş Ərəb Əmirliklərinin Azərbaycanın bərpaolunan enerji sahəsinə qoyduğu investisiyaların da dostluğumuzun və tərəfdaşlığımızın nümunəsi olduğunu vurğulayıb. Hesab edirəm ki, bu səfər zamanı əldə olunan razılaşmalar iki ölkə arasındakı əlaqələri daha da dərinləşdirəcək və biz qısa zamanda həm investisiya, həm də qarşılıqlı əməkdaşlıqlar çərçivəsində daha böyük proseslərin şahidi olacağıq”.
Ayşən Vəli
Bütün xəbərlər Facebook səhifəmizdə
USD
EUR
GBP
RUB
