"Almaniya Azərbaycanın Avropadakı vacib siyasi-iqtisadi tərəfdaşlarından biridir və bu baxımdan da Almaniya Prezidentinin Azərbaycana səfəri xüsusi əhəmiyyət daşıyır". Bu sözləri SİA-ya açıqlamasında politoloq Rəşad Bayramov deyib.
Onun sözlərinə görə, sözsüz ki, Almaniya prezidenti Frank-Valter Ştaynmayerin Azərbaycana rəsmi səfəri, iki ölkə arasındakı əlaqələrin güclənməsi üçün yeni imkanlar açır: "Onu da qeyd edim ki, bu səfər Almaniya Prezidenti Ştaynmayerin ölkəmizə ilk səfəri deyil. Ştaynmayer bundan əvvəl də Almaniya Xarici İşlər naziri qismində bir neçə dəfə ölkəmizdə səfərdə olub. 2007-ci ildə Azərbaycanda olarkən Ştaynmayer Azərbaycan və Almaniya arasında enerji təhlükəsizliyi, iqtisadi əməkdaşlıq sahəsində və ümumiyyətlə Azərbaycan və Almaniya arasında münasibətlərin daha da inkişaf etdirilməsinin vacibliyi ilə bağlı mövqedən çıxış edib. Sonrakı dövrdə, yəni 2014-cü ildə ölkəmizə səfəri çərçivəsində isə daha çox Qarabağ məsələsinin həlli prosesinə dəstək vermək və tərəflər arasında dialoqu təşviq etməklə bağlı Almaniyanın mövqeyini ortaya qoyub. İndi də bu və ya digər şəkildə Cənubi Qafqazda öz maraqlarını təmi etməyə cəhdlər edən Almaniya həm Ermənistana, həm də Azərbayana səfərləri ilə, eləcə də səfər çərçivəsində verdiyi sülhə çağırışlarla bağlı bəyantları ilə ölkəsinin sülh prossesində iştirakına nail olmaq istəyir. Almaniya uzun müddətdir ki, sülh prosesində aktiv rol oynamağa çalışır. Ştaynmayerin hər iki ölkəyə eyni vaxtda səfər etməsinə də bu siyasətin tərkib hissəsi kimi baxmaq lazımdır.
Prezident Frank-Valter Ştaynmayerin səfəri onu sübut edir ki, Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin regionda lider mövqeyini dəstəkləyir. Almaniya Prezidenti səfər zamanı bir daha ölkəmizin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəklədiyini ifadə etdi.
Hal-hazırda iki ölkə arasında demək olar ki, bütün sahələrdə əməkdaşlıq yüksək səviyyədə inkişaf etdirilir. Azərbaycan və Almaniya arasında iqtisadi əməkdaşlıq son dövrlərdə dinamik şəkildə inkişaf edir. Ticarət dövriyyəsinin üç dəfə artması, xüsusilə xam neft ixracının həcminin yüksəlməsi, bu əlaqələrin möhkəmləndiyini göstərir. Prezident İlham Əliyevin bəyanatında vurğulandığı kimi, gələcəkdə ticarət dövriyyəsinin daha da şaxələndirilməsi nəzərdə tutulur. Xüsusilə bərpaolunan enerji sahəsində əməkdaşlıq böyük perspektivlər vəd edir. Bu sahədə Almaniya şirkətləri ilə tərəfdaşlıq mühüm əhəmiyyət kəsb edir".
"Azərbaycanla Almaniya arasında təhsil, səhiyyə sahələri üzrə əməkdaşlıq da yüksələn xətlə inkişaf edir. Məlumdur ki, ölkəmizdə alman dilinə böyük maraq var. Bu məsələyə Almaniya Prezidenti çıxışında da toxundu. Belə ki, alman dili ölkəmizdə bir sıra orta və ali təhsil müəssisələrində tədris olunmaqdadır. Bundan başqa, ölkələrimiz arasında səhiyyə sahəsində də əməkdaşlıq genişlənməkdədir. Hazırda Almaniyada tibb sahəsində təhsil alan xeyli tələbəmiz də vardır. Azərbaycan Almaniya şəhərləri arasında da əlaqələr inkişaf etdirilir. Belə ki, paytaxt Bakı ilə Mayns, Sumqayıt ilə Lüdviqşafen şəhərləri qardaşlaşmış şəhərlər elan olunublar.
Səfərin yekunları ilə bağlı keçirilən mətbuat konfransında ölkə başçısı Azərbaycanın 30 il ərzində erməni işğalından əziyyət çəkməsi, beynəlxalq təşkilatların bu münaqişəyə ciddi müdaxilə etməməsi və ölkəmizin öz gücü ilə ədaləti bərpa etməsini bird aha xüsusilə vurğuladı. Prezidentin də qeyd etdiyi kimi Qarabağ Zəfəri regionda sülh prosesini sürətləndirdi və bu gün Azərbaycan-Ermənistan münasibətləri daha konstruktiv müstəviyə keçməkdədir.
Ümumiyyətlə isə hər iki ölkə rəhbərinin çıxışı, verdikləri bəyanatlar göstərir ki, bu səfər Azərbaycan-Almaniya əlaqələrində yeni əməkdaşlıq səhifəsi açacaq" - deyə o, əlavə edib.
Bütün xəbərlər Facebook səhifəmizdə
.jpg)
USD
EUR
GBP
RUB