Koronavirusa yoluxma hallarının sayı 3 faiz artıb

11 Avqust 2022 05:56 (UTC+04:00)

Ümumdünya Səhiyyə Təşkilatının məlumatına görə, son bir həftə ərzində 6,9 milyondan çox insan koronavirusa yoluxub, 14,5 mindən çox insan dünyasını dəyişib.

SİA AZƏRTAC-a istinadən xəbər verir ki, əvvəlki 7 günlə müqayisədə yoluxma hallarının sayı 3 faiz artıb, ölüm hallarının sayı isə 9 faiz azalıb.

Qərbi Sakit okean regionunda yoluxanların sayında artım (29 faiz) qeydə alınıb. Bununla belə, Afrikada (46 faiz), Şərqi Aralıq dənizində (22 faiz) və Amerikada (22 faiz) yoluxma hallarının sayı nəzərəçarpacaq dərəcədə azalıb. Şərqi Aralıq dənizi (19 faiz) və Qərbi Sakit okean regionunda (4 faiz) ölüm hallarının sayı artıb. Eyni zamanda, Afrikada (73 faiz), Avropada (15 faiz), Amerikada (10 faiz) və Cənub-Şərqi Asiyada (1 faiz) ölüm hallarının sayı azalıb.

Yaponiya bir həftə ərzində ən çox yoluxma halı (1 milyon 496 min 968) barədə məlumat verib. Ondan sonra ABŞ (759 min 806), Koreya Respublikası (713 min 78), Vyetnam (571 min 458) və Türkiyə (406 min 322) yer alıb. Yeddi gündə ən çox ölüm halı (2 min 764) ABŞ-da qeydə alınıb. Daha sonra Braziliya (1445), İtaliya (1059), Yaponiya (1002) və İspaniya (654) qərarlaşıb.