Gürcüstanın həbsdə olan keçmiş prezidenti Mixail Saakaşvilinin fiziki və psixoloji reabilitasiyaya ehtiyacı var, onun səhhəti diqqət tələb edir. SİA xəbər verir ki, bu sözləri ölkənin ombudsmanının yaratdığı şuranın həkimi Tengiz Tsuladze brifinqdə deyib.
"Bizim hesabata görə, həbsxana şəraitində daha az real olan, lakin cəhd etməyə dəyərli olan fiziki və psixoloji reabilitasiya da daxil edilməlidir", deyə Tsuladze bildirib.
Onun sözlərinə görə, “Saakaşvilinin səhhətinin vəziyyəti diqqət tələb edir, çünki hələ də posttravmatik simptomlar, anemiya, zəiflik, koordinasiyanın pozulması ifadə edilir”.
Tsuladze hesab edir ki, şuranın tövsiyə etdiyi reabilitasiya Gürcüstanda həyata keçirilə bilər.
"Tibbi müalicə, əlbəttə ki, vacibdir, lakin psixoterapiya və psixoloji reabilitasiya da vacib müalicə üsullarıdır. Müalicə edilməzsə, depressiyaya və travma sonrası stress pozğunluğuna səbəb ola bilər. Bu, həmçinin intihar düşüncələrini və depressiya ilə əlaqəli bir çox başqa şeyləri artırır", deyə həkim əlavə edib.
Xatırladaq ki, Saakaşvili oktyabrın 1-də Gürcüstanda saxlanılıb. Bundan əvvəl Gürcüstanda o, bankir Sandro Qirqvlianinin qətli və deputat Valeri Gelaşvilinin döyülməsi işlərində qiyabi mühakimə olunub. Birinci halda Saakaşvili üç il, ikincidə isə altı il müddətinə azadlıqdan məhrum edilib. Bundan əlavə, o, 2007-ci il noyabrın 7-də müxalifətin mitinqinin dağıdılması, “İmedi” teleşirkətinin talan edilməsi və dövlət büdcəsindən vəsaitlərin mənimsənilməsi ilə bağlı işlərdə təqsirləndirilən şəxsdir və bunlara hələ də məhkəmələr baxır. Gürcüstan hakimiyyəti Saakaşvilini azad etməkdən imtina edir. Baş nazir İrakli Qaribaşvili bildirib ki, eks-prezident uzun müddət həbsdə qalacaq, onun üçün nəzərdə tutulan, tələb olunan müddətin hamısını çəkəcək.