Azərbaycan Dövlət Himni mərasimi keçirilib - FOTOLAR

6 İyun 2021 15:59 (UTC+04:00)

Formula 1 Azərbaycan Qran Prisi çərçivəsində Azərbaycan Dövlət Himni mərasimi keçirilib. SİA-nın məlumatına görə, Formula 1 Azərbaycan Qran Prisi beşinci dəfə günəşli Bakı küçələrinə qayıdır. Asfalt сəngavərləri Bakı Şəhər Halqasını alovlandırmazdan öncə, bütün komandalar və tədbir qonaqları himn üçün ayağa qalxır.

Mərasimdə Azərbaycanda keçirilən beşinci yarış konsepsiyası vurğulanır və digər konsepsiya - multikulturalizm və tolerantlıq ideyasına əsaslanır.
Bu il Azərbaycan Respublikasının Dövlət Himni Atəş Qarayev və Səbinə Babayeva tərəfindən səsləndirilir.

Himn səsləndirilən zaman Azərbaycan Dövlət Bayrağını tutan müxtəlif millətlərin nümayəndələri trek üzərində dayanır. Onlar Bakıda keçirilən beşinci Formula 1 yarışını simvolizə edən və barış işarəsini əks etdirən “V” şəklində dayanıblar.
Qeyd etmək lazımdır ki, bu mərasim üçün yaradılan Himnin xüsusi versiyası tanınmış Azərbaycan bəstəkarı və musiqi prodüseri Azad Vəliyev tərəfindən hazırlanıb. Azərbaycan Respublikasının Dövlət Himninin bu tərtibatı Konstitusiya ilə dəqiq müəyyənləşdirilmiş formada təqdim olunur.