Mədəniyyətin Təbliği və Sosial Təşəbbüslər İctimai Birliyinin dəvəti ilə Bakıda səfərdə olan Türkiyənin məşhur “Kurtlar Vadisi Pusu” serialının baş rol ifaçılarından Erhan Ufak və ona aid olan “Eslem” yapım şirkətinin yaradıcı heyəti YAP Səbail rayon təşkilatının təşkilatçılığı ilə Səbail rayonunda bir neçə şəhid ailəsini ziyarət ediblər.
Qardaş Türkiyənin sənət adamları ilk öncə YAP Səbail rayon təşkilatının sədri prof. Şəmsəddin Hacıyevlə görüşüblər. Səmimi söhbət şəraitində keçən görüşdə məlumat verilib ki, Mədəniyyətin Təbliği və Sosial Təşəbbüslər İctimai Birliyi Türkiyənin sənət adamlarının təcrübəsindən bəhrələnmək və yeni istedadlı gənclərin yetişdirilməsi məqsədilə “Sənət Akademiyası” layihəsinə start verib. Layihənin əsas məqsədi iki qardaş dövlət arasında aparılan sürətli işğüzar əlaqələrdə həm vətəndaş kimi, həm də İctimai Birlik olaraq töhfə vermək, Azərbaycanda müxtəlif sənət sahələrində, o cümlədən kino və serial sahəsini inkişaf etdirmək məqsədi ilə gəncləri bir araya gətirməkdir. Layihənin ilk ulduz qonağı olan məşhur aktyor Erhan Ufak 44 günlük Vətən müharibəsində Azərbaycanın qazandığı möhtəşəm Qarabağ Zəfəri münasibətilə bir daha xalqımızı təbrik etdi və Azərbaycan-Türkiyə arasındakı qardaşlığın əbədi və sarsılmaz olduğunu vurğulayıb.
Türkiyəli qonaqlar Səbail rayonunun Vətən müharibəsi şəhidləri Murad Qurbanov Asif oğlu və Bilal Qənbərov Xanlar oğlunun ailələrini evlərində ziyarət edib, şəhid ailə üzvləri ilə həmsöhbət olublar. Söhbət zamanı Azərbaycanın igid övladlarının 44 günlük şərəf mübarizəsində göstərdiyi misilsiz şücaət, mərdlik xüsusi qeyd olunub, şəhid ailə üzvləri ilə birlikdə qəhrəman şəhidlərimizin döyüş yoluna nəzər salınıb, Vətən torpaqlarının azadlığı və Azərbaycanın ərazi bütövlüyü uğrunda Şəhadət zirvəsinə ucalan bütün şəhidlərimizin əbədiyaşar ruhuna dualar oxunub. Həmçinin, şəhidlərimiz Murad və Bilal haqqında unudulmaz, dəyərli xatirələr dinlənilib.
Şəhid ailələri onlara göstərilən diqqət və qayğıya görə ürəkdən təşəkkür ediblər. Ailələrə ərzaq sovqatı təqdim olunub.
Rəfiqə