Avstriyanın Federal Kansleri Sebastian Kurz Rusiya və ABŞ liderlərinin görüşünü təşkil etməyin ölkəsi üçün böyük bir şərəf olacağını söyləyib. SİA RenTV-yə istinadən xəbər verir ki, Kurz bu görüşün təkcə ABŞ və Rusiya Federasiyası üçün deyil, bütün dünya üçün faydalı olacağını vurğulayıb və bu barədə Avstriya nəşri sitat gətirir.
"Harada olursa olsun, belə bir görüş varsa, bu, bütün dünya üçün, bütün Avropa üçün yaxşıdır. Ancaq təbii ki, Avstriyada, Vyanada baş tutarsa, bu böyük şərəfdir bizim üçün", deyə Kurz bildirib.
Avstriya lideri ofisinin Rusiya və ABŞ ilə artıq danışıqlar apardığını söyləyib və hər iki tərəfə də müvafiq istəklər təqdim olunduğunu bəyan edib.
"Əgər belə bir görüşün keçirilməsi həqiqətən nəzərdə tutulursa, biz artıq Rusiya və Amerika tərəfləri ilə əlaqə saxlayırıq", deyə o qeyd edib.
Xatırladaq ki, Vladimir Putin ilə Co Bayden arasında ABŞ-ın təşəbbüsü ilə aparılan telefon danışıqlarının ardından Baydenin Putinə yaxın aylarda neytral yerdə, "üçüncü bir ölkədə" görüşməyi təklif etdiyi bildirilib. Amerika administrasiyasına görə, liderlərin dialoqu yayda baş tuta bilər. Kreml, öz növbəsində, hər iki tərəfin qlobal təhlükəsizliyin təmin edilməsinin ən vacib sahələri üzrə dialoqu davam etdirməyə hazır olduqlarını nəzərə çatdırıb.
Qeyd edək ki, Putin və Bayden arasındakı görüşün artıq Avropa ölkələrindən birində keçirilməsi təklif edilib. Çex Respublikası artıq yüksək zirvəyə ev sahibliyi etməyə hazır olduğunu bəyan edib.
Onu da vurğulayaq ki, dialoqa hazırlıq bəyanatları ilə eyni vaxtda Amerika Prezidenti Co Bayden yeni anti-Rusiya sanksiyalarının tətbiqi barədə bir fərman da imzalayıb. Ağ Evdən edilən açıqlamada, Baydenin yeni fərmanının, beynəlxalq aləmdəki sözdə sabitliyi pozan hərəkətlərini "davam edərsə ya da artırarsa" strateji və iqtisadi xərclər çəkəcəyini Rusiya Federasiyasına aydınlaşdırmaq məqsədi daşıdığı deyilir. Nəzərə çatdıraq ki, ABŞ səlahiyyətlilərinin on rus diplomatı ölkədən çıxarmaq qərarına gəldiyi də bildirilib. ABŞ-ın Rusiyadakı səfiri Con Sallivan yeni anti-Rusiya sanksiyaları tətbiq edildikdən sonra Xarici İşlər Nazirliyinə çağrılıb.