Ermənistanın baş naziri Nikol Paşinyan Rusiya prezidenti Vladimir Putinlə görüşündə söhbətə hərbi əsirlərlə başlayıb, sonra isə İrəvanda yazdıqlarını bir-bir Kremlin sahibindən xahiş edib. SİA xəbər verir ki, onun istədiyi ilk şey Ermənistanda yeni atom elektrik stansiyası tikmək imkanlarını nəzərdən keçirməkdir.
"Ümid edirəm ki, bu gün strateji investisiyalarla əlaqəli bəzi məsələləri müzakirə edəcəyik və bu mənada bu gün sizinlə Ermənistan Respublikasında yeni bir atom elektrik stansiyası tikmək imkanlarını müzakirə etmək istəyirəm". Paşinyan danışıqların əvvəlində belə deyib.
Ermənistanın Ərazi İdarəetmə və İnfrastruktur naziri Suren Papikyan mövzu ilə bağlı bir müddət öncə Ermənistanın 2040-cı ilədək enerji sektorunun inkişafı üçün strateji proqramın əsas məqsədinin uzunmüddətli hədəflərə uyğun olaraq yeni bir atom elektrik stansiyasının inşası olduğunu bildirmişdi.
Qeyd edək ki, Ermənistanın AES-i Cənubi Qafqazdakı yeganə atom elektrik stansiyasıdır və Ermənistanda istehsal olunan elektrik enerjisinin üçdə birindən çoxunu istehsal edir. Rusiya və Ermənistanın nüvə enerjisi sahəsindəki əsas layihəsi, Ermənistan AES-in ikinci enerji blokunun modernləşdirilməsi və istismar müddətinin uzadılması layihəsidir.
Paşinyanın ikinici istədiyi şey bir milyondan çox "Sputnik V" peyvəndi olub. O, xatırladıb ki, Ermənistan onsuz da təxminən 15 min doza qəbul edib, sabah bu partiya respublikaya gələcək. "Bu, Rus peyvəndinin simvolik bir partiyasıdır. Effektivliyini sübut etdi". Respublika hökumətinin başçısı belə deyib.
Rusiya lideri rus peyvəndinin artıq Ermənistanda qeydiyyata alınıb-alınmadığını soruşub və Paşinyan müsbət cavab verib.
Ermənistan baş nazirinin sözlərinə görə, Rusiya indi də dərmana böyük ehtiyacın olduğunu başa düşür. Bununla əlaqədar olaraq Putin, peyvənd istehsalının indi "sürətləndiyini" qeyd edib və söhbət kifayət qədər böyük bir həcmdən gedir. Onun sözlərinə görə, istehsal həcmi ümumiyyətlə ölkə daxilindəki tələb ilə müqayisə oluna bilər.
Rusiya dövlətinin başçısı məsələnin həll olunacağına əmindir.
Xatırladaq ki, peyvənd Qamaley adına Mərkəz tərəfindən istehsal olunur. Bu peyvənd dünyada qeydə alınan ilk koronavirus peyvəndidir. Artıq 50-dən çox ölkədə təsdiq edilib. Bu ölkələrin ümumi əhalisi 1,5 milyard nəfəri ötür.
Ermənistanın Baş naziri Nikol Paşinyan Rusiya prezidenti Vladimir Putinlə Rusiya-Ermənistan ortaq hərbi qüvvələr qrupunun fəaliyyətinin "bəzi nüanslarını" da müzakirə edib. Bu çərçivədə, Ermənistan baş naziri bölgədəki kollektiv hava hücumundan bəhs edib.
Bununla da Paşinyan Putindən daha bir şey istədiyini dilə gətirib.
"Ümid edirəm ki, bu gün Rusiya-Ermənistan birləşmiş qüvvələr qrupunun fəaliyyətindəki bəzi nüansları da müzakirə edəcəyik. Hazırda vahid regional hava hücumundan müdafiə sistemimiz də var". Paşinyan qeyd edib.
Bundan əvvəl, Ermənistan hökumətinin başçısı regional təhdidlərə qarşı birləşmiş qruplaşmanı gücləndirməyin lazım olduğunu bildirmişdi.
Xatırladaq ki, Ermənistan və Rusiya qoşunlarının vahid qruplaşması 2016-cı ildə yaradılıb. Qruplaşmanın əsas vəzifələri arasında Ermənistana və Rusiyaya qarşı birbaşa silahlı hücumun qarşısını almaq və dəf etməkdir.
Bütün bunların Paşinyanın dili ilə Moskvada səslənməsi heç də onların hamısının həyata keçəcəyindən xəbər vermir.
Xatırlayırsınızsa, Paşinyanın Putinlə son görüşündə ölkə ictimaiyyəti üçün nəzərdə tutulan “Azərbaycanda olan hərbi əsirlərin hamısı geri qaytarılmalıdır” açıqlaması elə deyildiyi kimi havada qaldı.
Rəsmi Bakı isə “Bütün hərbi əsirlər geri qaytarılıb” bəyanatı ilə söhbətə son qoydu.