“Davos gündəliyi 2021” inamı bərpa edə biləcəkmi?

26 Yanvar 2021 13:13 (UTC+04:00)

Dünya İqtisadi Forumunun 25-29 yanvar tarixlərində “Davos gündəliyi 2021” tədbiri keçirilir. Hər il baş tutan ənənəvi Davos İqtisadi Forumu bu il pandemiya ilə bağlı təhlükəsizlik tədbirləri səbəbindən virtual formada öz işinə davam edəcək.

İqtisadi İslahatların Təhlili və Kommunikasiya Mərkəzinin analitiki Ayhan Satıcı bildirir ki, tədbir çərçivəsində bir çox iqtisadi, sosial, ekoloji və texnoloji məsələlər, o cümlədən, iqtisadiyyatın davamlı inkişaf sistemləri, sənaye transformasiyası və inkişafı, qlobal resurs idarəçiliyin inkişafı, Dördüncü Sənaye İnqilabının texnoloji imkanları, qlobal və regional əməkdaşlığın inkişafı kimi mövzular ətrafında dünya liderlərinin, iş adamlarının, beynəlxalq təşkilat üzvlərinin və s. iştirakçıların müzakirəsi olacaqdır. Pandemiyanın qlobal səviyyədə yaratdığı sistematik dəyişikliklər, 2020-ci ildə ortaya çıxan problemlər və 2021-ci ildə bəşəriyyəti gözləyən digər aktual məsələlər də Forumun müzakirə mövzularındandır. Həmçinin, Davos gündəliyi çərçivəsində COVİD-19 pandemiyasının vurduğu zərərlərin minimallaşdırılması üçün innovativ, dayanıqlı və inkişafa meyilli institusional yanaşmaların müzakirəsi də gözlənilir.

“Davos gündəliyi 2021” tədbiri Dünya İqtisadi Forumunun “Böyük Sıfırlama Təşəbbüsü”-ün başlamasına və yazda baş tutması gözlənilən xüsusi illik görüşün hazırlıqlarına öz töhfəsini verəcəkdir.

Ayhan Satıcı bildirir ki, “Davos gündəliyi 2021”-in bu il çatdırmaq istədiyi əsas mesajlardan biri “İnamın bərpa edilməsi üçün həlledici il” (A Crucial Year to Rebuild Trust) mövzusudur. Tədbir 70 ölkəni əhatə edən 1500-dən çox dövlət, özəl və vətəndaş cəmiyyəti liderlərinin iştirakı ilə 5 proqram mövzusundan ibarət olacaqdır. Həmin proqramların mövzuları hər bir gün olaraq 25-29 yanvar tarixlərində planlaşdırılıb. Belə

ki, “Davamlı və dayanıqlı iqtisadi sistemlərin dizaynı”, “Məsuliyyətli sənayə transformasiyası və inkişafı”, “Qlobal resurs idarəçiliyin inkişafı”, “Dördüncü Sənaye İnqilabının texnoloji imkanları” və “Qlobal və regional əməkdaşlıqların inkişafı” mövzuları müzakirəyə çıxarılacaq. Qeyd edək ki, Davos İqtisadi Forumu isveçrəli professor Klaus Şvabın təşəbbüsü ilə 1971-ci ildə dünya iqtisadiyyatının perspektivlərini müzakirə etmək və ümumi strategiya hazırlamaq məqsədilə yaradılıb. Forum steykholder kapitalizmi ideyasını davamlı olaraq müdafiə və təbliğ edir. Forumun rəhbəri porofessor K. Şvabın müdafiə etdiyi steykholder kapitalizmi bütün maraqlı tərəflər (steykholderlərin) maraqlarının qounmasını iqtisadi inkişaf üçün vacib hesab edir. Forumun hər il keçirilməsində əsas məqsəd dövlət və hökumət başçılarını, beynəlxalq təşkilatları, elm adamlarını, nüfuzlu siyasətçiləri, iqtisadçıları, biznesmenlərin iştirakı ilə yeni beynəlxalq iqtisadi layihələrin həyata keçirilməsini, aktual problemləri və gələcəklə bağlı gözləntiləri müzakirə etməkdir.