Müğənni-bəstəkar Murad Arif düşməndən azad olunan Ağdamla bağlı xatirələrini bölüşüb. SİA-nın məlumatına görə, o, bu sözləri deyib: "Sumqayıtda atamın kinoteatrı var idi. Klub direktoruydu. Hündür tavanlar, nəhəng dəhliz, pilləkənlər, bir otaq boyda çılçıraqlar, kino zalı... Atamla kluba getmək ən gözəl əyləncəm idi... 1990-ların əvvəlində kluba köçkünlər məskunlaşdı, atam da təqaüdə çıxdı, o nağıl bitdi.
Üstündən 30 ilə yaxın vaxt keçib. Atam rəhmətə gedəndən sonra maşınımı o məhəlləyə, kinoteatrın həyətinə sürdüm. Bəlkə hansısa xatirəm oyanar, o günlərə qayıdaram. Olmadı... O memarlıqdan, əzəmətli binadan heç nə qalmayıb. İçərisi otaqlara bölünüb, pəncərələr hörülüb...
Uşaqlığımın sarayı, tamaşaçılarla var-gəl edən mədəniyyət ocağı, daxmaya dönmüşdü. Adam o məqamda anlamasa da, nədənsə inciyir. Sanki məkan, həmin yer səndən üz döndərib...
İndi Ağdamda da eyni halı yenidən yaşayacağam. Eyni görüş həyəcanı, eyni viranəlik, eyni tale...".