Yer kürəsindən daha əlverişli planetlər kosmosda tapılıb

6 Oktyabr 2020 10:07 (UTC+04:00)

Kosmosda həyat üçün Yer kürəsindən daha əlverişli planetlər var. SİA RİA Novostinin yayımladığı məlumata istinadən xəbər verir ki, ABŞ və Almaniya astrobioloqları apardıqları uzun araşdırmalardan sonra bu nəticəyə gəliblər və tədqiqatın nəticələri “Astrobiology jurnal”da dərc edilib.

Alimlər 4500 ekzoplanetin istilik, rütubət və ətraf mühitin digər amilləri haqqında məlumatları toplayıblar. Bunlardan Yer kürəsindən daha yaşlı, böyük, isti və nəm olan 24 planeti seçiblər.
Müəlliflərin fikrincə, bu cür planetlərdə həyatın Yer üzündə olduğundan daha yüksək formalarda inkişafı üçün fürsəti olub.
Bu 24 planetin hamısı Yerdən yüz işıq ilindən uzaq məsafədə yerləşir.
Gələcəkdə onların NASA-nın “James Webb” və “LUVIOR”, eləcə də Avropa Kosmik Agentliyinin “PLATO” kosmik teleskopları ilə araşdırılacağı gözlənilir.