Rejissorumuz Beynəlxalq Turizm Filmlər Festivalının qalibi olub

20 Sentyabr 2020 12:30 (UTC+04:00)

Türkiyənin tarixi Kapadokya bölgəsində keçirilən Beynəlxalq Turizm Filmləri Festivalında Bakı Media Mərkəzinin istehsalı olan, mərkəzin rejissoru Fuad Quliyevin "My Country-Azerbaijan" ("Mənim ölkəm- Azərbaycan") tanıtım filmi ölkə nominasiyası üzrə "Qızıl mükafat"a ("Gold Award") layiq görülüb.

SİA xəbər verir ki, tanıtım filmində Azərbaycanın tarixi, təbiəti, turizm imkanları, mədəniyyəti və mətbəxi tərənnüm olunur. Hər bir turist bu filmdə özü üçün doğma çalarlar da tapa bilər. Məqsəd hər kəsə onun üçün vətən deyə biləcəyi ölkənin əsas cizgilərini göstərməkdir.

Qeyd edək ki, Bakı Media Mərkəzinin rejissoru Fuad Quliyevin tanıtım filmləri davamlı olaraq müxtəlif beynəlxalq festivallarda geniş auditoriyaya təqdim olunub və həmin festivalların təcrübəli mütəxəssisləri tərəfindən yüksək qiymətləndirilib. 2018-ci ildə Bakı Media Mərkəzinin istehsalı olan, mərkəzin rejissoru Fuad Quliyevin "The Spirit of Azerbaijan - Azərbaycan ruhu" tanıtım filmi də Beynəlxalq Turizm Filmləri Festivalının xüsusi mükafatına layiq görülmüşdü. Həmin qısametrajlı reklam filmində Azərbaycan mədəniyyəti, incəsənəti və arxitekturası yüksək zövqlə tərənnüm edilir.

Xatırladaq ki, Beynəlxalq Turizm Filmləri Festivalları Komitəsinə (CIFFT) bağlı 20 üzv ölkədə 30 ildir keçirilən Beynəlxalq Turizm Filmləri Festivalı bu il Türkiyənin Mədəniyyət və Turizm Nazirliyinin dəstəyilə reallaşır. Builki festivalda 18 ölkədən 45-ə yaxın rejissor və turizm mütəxəssisi iştirak edir. Pandemiya şəraitinə görə xüsusi qaydalarla keçirilən festivalda film nümayişləri sentyabrın 16-18-də Nevşehir Qalasında açıq havada baş tutub.