Pandemiyaya görə dünya iqtisadiyyatına nə qədər ziyan dəyəcək?

17 Sentyabr 2020 16:39 (UTC+04:00)

Koronavirusun yayılması səbəbindən dünya iqtisadiyyatına dəyən ümumi zərər 2021-ci ilin sonuna qədər 7 trilyon ABŞ dolları təşkil edəcək. SİA xəbər verir ki, bu qiymətləndirməni İqtisadi Əməkdaşlıq və İnkişaf Təşkilatının (İƏİT) baş iqtisadçısı Lorans Bun “Les Echos” qəzetinə verdiyi müsahibədə açıqlayıb.

“2021-ci il üçün proqnozlarımızı dəyişdirməmişik. Dünya iqtisadiyyatı proqnozlaşdırılandan daha sürətli bərpa olunmayacaq. Virusla hələ bir çox ay yaşayacağıq. 2021-ci ilin sonuna qədər qlobal ÜDM 7 trilyon ABŞ dolları itirəcək. Bu ciddi sarsıntıdır”, deyə baş iqtisadçı bildirib.

Qeyd edək ki, İƏİT çərşənbə günü yaydığı hesabatda koronavirusun yayılması ilə bağlı vəziyyətin müsbətə doğru dəyişəcəyi halda 2020-ci ildə dünya ÜDM-nin azalma göstəricisinin əvvəlcədən proqnozlaşdırıldığı kimi 6% deyil, 4,5% ola biləcəyini qeyd edib.

Təşkilatın yeni hesabatında 2020-ci ildə qlobal istehsalda azalmanın gözləniləndən daha az olduğu, lakin ən yeni tarix üçün görünməmiş hal olduğu vurğulanır. İƏİT-dən bildiriblər ki, məhdudlaşdırıcı tədbirlərin yüngülləşdirilməsindən və müəssisələrin yenidən işə başlamasından sonra istehsal həcmləri sürətlə artıb, lakin yay aylarında qlobal bərpa sürəti bir qədər yavaşlayıb.