BNA qəzaya uğramış avtobuslar barədə məlumat yayıb

3 Avqust 2020 10:05 (UTC+04:00)

Bu gün səhər Ziya Bünyadov prospektində qəzaya düşən "İVECO" markalı avtobuslar "BakuBus" MMC-nin istismarında olan nəqliyyat vasitələri deyil.

SİA-nın məlumatına görə, bu barədə Bakı Nəqliyyat Agentliyinin Mətbuat xidmətinin rəhbəri Mais Ağayev bildirib.

Onun sözlərinə görə, qəzaya uğrayan avtobuslar ümumiyyətlə, şəhərdaxili hər hansı bir müntəzəm xətlərə aid deyil.

Xatırladaq ki, bu gün Fövqəladə Hallar Nazirliyinin "112" qaynar telefon xəttinə Bakı şəhərinin Nərimanov rayonunda "İveco" markalı iki sərnişin avtobusunun toqquşması barədə məlumat daxil olub. Hadisə yerinə cəlb olunan Xüsusi Riskli Xilasetmə Xidmətinin müvafiq xilasetmə qüvvələri avtobuslardan birində sıxılı vəziyyətdə qalan sürücünü deformasiyaya uğrayan nəqliyyat vasitəsindən çıxarıb və aidiyyəti üzrə təhvil veriblər.