Azərbaycan Respublikasının Prezidenti İlham Əliyev və xanımı Mehriban Əliyeva aprelin 29-da Bakı Sərgi Mərkəzində "AİTF -2011" 10-cu Azərbaycan Beynəlxalq turizm və səyahətlər, 2-ci Ümumrespublika daxili turizm sərgiləri ilə tanış olublar.
SİA-nın xəbərinə görə, mədəniyyət və turizm naziri Əbülfəs Qarayev dövlətimizin başçısına məlumat verdi ki, "AİTF -2011" sərgisində 61 turizm istiqaməti təqdim edilməklə 24 ölkədən 230 şirkət, 2-ci Ümumrespublika daxili turizm sərgisində isə Azərbaycanın 15 rayonundan 83 turizm subyekti iştirak edir. Mədəniyyət və Turizm Nazirliyinin dəstəyi, "İTE Group plc" və "İteca Caspian" şirkətlərinin təşkilatçılığı ilə keçirilən sərgidə tərəfdaş ölkə kimi Türkiyə, rəsmi hava yolları qismində isə "Azərbaycan Hava Yolları" Qapalı Səhmdar Cəmiyyəti çıxış edir. "AİTF-2011" sərgisində Türkiyə, Misir, Gürcüstan, Rusiya Federasiyasının Dağıstan Respublikası, Çexiya, Yunanıstan və Hindistanın turizm potensialını əks etdirən məhsullarla yanaşı, əyləncə proqramları, kulinariya şouları, Azərbaycan və dünya xalqlarının rəqsləri, eləcə da təsviri incəsənət və dulusçuluq işləri nümayiş etdirilir.
Prezident İlham Əliyev və xanımı Mehriban Əliyeva Azərbaycanın müxtəlif regionlarının və xarici ölkələrin turizm potensialını əks etdirən stendlərə baxdılar. Dövlətimizin başçısına və xanımına regionlarımızın və xarici ölkələrin əlverişli turizm imkanları haqqında ətraflı məlumat verildi.
Prezident İlham Əliyev və xanımı Mehriban Əliyeva Azərbaycan Milli Kulinariya Mərkəzinin qazandığı beynəlxalq nailiyyətləri əks etdirən stendə də baxdılar. Kulinarlar dövlətimizin başçısı və xanımı ilə xatirə şəkli çəkdirdilər.