Türkiyə Prezidenti yeddi aylıq əməkhaqqını Milli Həmrəylik Kampaniyasına ianə edib

30 Mart 2020 23:53 (UTC+04:00)

Türkiyədə koronovirusla mübarizə tədbirləri çərçivəsində Milli Həmrəylik Kampaniyası başladılıb. Kampaniyanın əsas məqsədi aztəminatlı ailələrə əlavə maddi dəstək göstərməkdir.

SİA xəbər verir ki, bu barədə Türkiyə Prezidenti Rəcəb Tayyib Ərdoğan Nazirlər Kabineti yığıncağından sonra açıqlamasında bildirib.

Türkiyə Prezidenti yeddi aylıq əməkhaqqı məbləğini kampaniya çərçivəsində ölkənin Ailə, Əmək və Sosial Xidmətlər Nazirliyi nəzdində açılan hesaba ianə edib.

Toplantıda sağlamlıq tədbirləri, qida və ictimai təhlükəsizlik kimi mövzuların müzakirə olunduğunu bildirən Rəcəb Tayyib Ərdoğan epidemiyanın ilk günlərindən etibarən elmi komitənin tövsiyələrinə uyğun olaraq Türkiyədə sağlamlıq tədbirlərinin tamamilə həyata keçirildiyini, koronovirusla mübarizə üçün ölkədə istər tibbi heyət, istəsə də avadanlıq baxımından heç bir çətinliyin olmadığını, yeni xəstəxanaların istifadəyə verildiyini, gələcək aylarda da ən son texnologiyalara uyğun bir necə tibb ocağının açılacağını deyib.

Bildirilib ki, hazırda ölkədə hər gün on min nəfər koronavirus testindən keçirilir, 39 yaşayış məntəqəsi karantinə alınıb.

Qeyd edilib ki, hazırda ölkənin 41 şəhərində yerləşən tələbə yataqxanalarında 21 min 500 vətəndaş karantindədir.