Qaçqınların və Məcburi Köçkünlərin İşləri üzrə Dövlət Komitəsinin “Əsgərə salam” hərbi-vətənpərvərlik aksiyası çərçivəsində məcburi köçkün gənclər arasında təşkil etdiyi futzal turniri başa çatıb. SİA-nın məlumatına görə, AFFA-nın dəstəyi ilə “Azfar Group” şirkətinin Böyükşor bulvarı yaxınlığındakı örtülü stadionunda üç həftə ərzində baş tutan turnirdə Bakı, Sumqayıt şəhərlərində və Abşeron rayonunda məcburi köçkünlər üçün salınmış qəsəbələrdən 9 komanda iştirak edib.
Yarımfinal mərhələsində “Ərgünəş” (Qaradağ rayonu, Müşfiqabad qəsəbəsi), “Həkəri” (Sumqayıt şəhəri, 12-ci mikrorayon), “Çinar” (Abşeron rayonu, Masazır qəsəbəsi), “Qarant” (Qarant yaşayış kompleksi) komandaları yarışıblar. “Ərgünəş” “Həkəri”yə 3:2, “Çinar” isə “Qarant”a 4:2 hesabı ilə qalib gələrək finala vəsiqə qazanıb. Finalda “Ərgünəş" “Çinar”ı 4:2 hesabı ilə məğlub edərək turnirin qalibi olub.
Qaliblərinin mükafatlandırılması mərasimində çıxış edən Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev ölkədə idmanın və bədən tərbiyəsinin inkişafına, gənc nəslin fiziki və mənəvi sağlamlığına dövlətin böyük qayğı göstərdiyini, bu qayğının məcburi köçkün gəncləri də əhatə etdiyini diqqətə çatdırıb.
Qeyd edilib ki, məcburi köçkün gənclər arasında idmanın kütləviliyinin artırılması, onların sağlam həyat tərzinə təşviq edilməsi üçün tədbirlər həyata keçirilir, mövcud yaşayış komplekslərində bədən tərbiyəsi və idmanla məşğul olmaq üçün yeni zallar açılır, idman qurğuları yaradılır.
Dövlət Komitəsinin sədri ilk dəfə keçirilən futzal turnirinin qaliblərini təbrik edib, bu turnirin ənənəvi olaraq hər il keçirilməsinin, respublikanın bölgələrini əhatə etməsinin, həmçinin məcburi köçkünlər arasında digər idman növləri üzrə turnirlərin də təşkil olunmasının nəzərdə tutulduğunu bildirib.
AFFA-nın vitse-prezidenti Vaqif Sadıqov və Şuşa Rayon İcra Hakimiyyətinin başçısı Bayram Səfərov çıxış edərək qalib komandanı təbrik edib, uğurlar arzulayıblar. Bu cür turnirlərin keçirilməsi yüksək qiymətləndirilib.
Sonra qaliblərə və turnirdə fərqlənənlərə mükafatlar təqdim edilib.