Yaponiyada yeni koronavirusun (Kovid-19) yayılması səbəbindən Yokohama limanında karantinə alınan "Diamond Princess" kruiz gəmisində iki sərnişin ölüb. SİA bunu xarici KİV-lərə istinadən xəbər verir.
Yaponiyanın Kyodo xəbər agentliyinin verdiyi məlumata görə, 500-dən çox sərnişində "Kovid-19" virusunun aşkarlandığı "Diamond Princess" gəmisində 80 yaşlı qadın və kişi sərnişin ölüb.
Ölən sərnişinlərin şəxsiyyətləri haqqında ətraflı məlumat verilməsə də, Yaponiyada virusdan ölənlərin sayı 3-ə yüksəlib.
Xatırladaq ki, ölkədə 80 yaşlarında bir qadın keçən həftə Kanagava bölgəsində "Kovid-19"un səbəb olduğu sətəlcəmdən dünyasını dəyişib.
Paytaxt Tokio yaxınlarındakı Yokohama limanında 4 fevraldan karantinə alınan və 3 min 500-dən çox sərnişinin və gəmi heyətinin olduğu "Diamond Princess" adlı kruiz gəmisində test cavabları neqativ çıxan sərnişinlərin təxliyəsinə başlanılıb.