Nərimanov Rayon İcra Hakimiyyəti, Yeni Azərbaycan Partiyasının (YAP) Nərimanov və Xətai rayon təşkilatlarının gənclər birliyinin birgə təşkilatçılığı ilə 9 Noyabr Dövlət Bayrağı Günü ilə bağlı Qara Qarayev adına 8 saylı Mərkəzi İncəsənət Məktəbində tədbir keçirilib. SİA-nın verdiyi məlumata görə, tədbirdə Milli Məclisin deputatı Hikmət Babaoğlu, YAP Nərimanov rayon təşkilatının sədri Təmraz Tağıyev, Qara Qarayev adına 8 saylı Musiqi Məktəbinin direktoru Əziz Qarayusifli, Nərimanov rayon Gənclər və İdman İdarəsinin rəisi Nəcəf Novruzov, YAP Gənclər Birliyinin ofis rəhbəri Elmar Məmmədov və fəal gənclər iştirak ediblər.
Tədbir Azərbaycan Respublikasının Dövlət Himninin səsləndirilməsi ilə başlanıb. Daha sonra Dövlət Bayrağı Gününə həsr olunmuş videoçarx nümayiş olunub.
Tədbirdə Milli Məclisin deputatı Hikmət Babaoğlu və YAP Nərimanov rayon təşkilatının sədri Təmraz Tağıyev çıxış edərək 1990-cı ildə ölkəmizdə baş verən hadisələrdən, 70 ildən sonra üçrəngli bayrağımızın xalqımızın Ümummilli Lideri Heydər Əliyevin təşəbbüsü ilə Naxçıvan Muxtar Respublikasının Ali Məclisində ucaldılmasından, muxtar respublikanın dövlət bayrağı kimi qəbul olunmasından, Azərbaycan Ali Soveti qarşısında bununla bağlı vəsatət qaldırılmasından danışıblar.
Qeyd olunub ki, Prezident İlham Əliyev bu mühüm dövlət atributu ilə bağlı müvafiq qərarlar qəbul edib. Belə ki, dövlətimizin başçısının 17 noyabr 2009-cu il tarixli Sərəncamı ilə Dövlət Bayrağı Günü təsis olunub, 2010-cu ilin sentyabrında isə möhtəşəm Dövlət Bayrağı Meydanı yaradılıb. Üçrəngli bayrağımız bu gün dünyanın 70-ə yaxın ölkəsində Azərbaycanın müxtəlif statuslu diplomatik nümayəndəlikləri üzərində dalğalanır. Beynəlxalq tədbirlərdə, idman arenalarında qaldırılır və bu, hər bir soydaşımızın qəlbini iftixar hissi ilə doldurur. Xalqımızın ən böyük arzusu bayrağımızın Xankəndində, Şuşada və işğal olmuş digər rayonlarımızda dalğalanmasını görməkdir.
YAP Nərimanov rayon Gənclər Birliyinin sədr müavini Vüsal Əliyev və YAP Xətai rayon Gənclər Birliyinin sədri Orxan Bayramov da çıxış edərək dövlət bayrağının hər bir Azərbaycan vətəndaşının qürur mənbəyi, müstəqil dövlətimizin isə şərəfi, qüdrəti olduğunu və gənc nəslin vətənpərvərlik ruhunda formalaşmasında böyük rol oynadığını qeyd ediblər .
Daha sonra tədbir bədii hissə ilə davam edib.