“Qəbələ” klubu müdafiəçi Ürfan Abbasovla yollarını ayırıb. SİA-nın məlumatına görə, Ü.Abbasov 2019-2020-ci illər mövsümündən “qırmızı-qara” formada çıxış etməyəcək.
27 yaşlı müdafiəçi 2011/12 mövsümündən "Qəbələ"nin şərəfini qoruyub. O, bu müddətdə 220 matçda meydana çıxıb. Müdafiəçinin hesabında 3 qol var. Ü.Abbasov Premyer Liqada 177, kubokda 28, Avropa Liqasında 15 matça çıxıb. Ürfan bütün qollarını ölkə çempionatında vurub.
O, “Qəbələ”də keçirdiyi 8 mövsümdə Premyer Liqanın beş mükafatını qazanıb. Müdafiəçi 2016/17 və 2017/18 mövsümlərində gümüş, 2013/14, 2014/15 və 2015/16 mövsümlərində bürünc medala yiyələnib. Ü.Abbasov 2018/19 mövsümündə Azərbaycan kubokunun qalibi, 2013/14, 2016/17 və 2017/18 mövsümlərində finalçısı olub.
Qeyd edək ki, “Qəbələ” Cavid Hüseynov, Elvin Camalov, Stiven Jozef Monroz, Lalavele Atakora, Sabien Lilay və Rauf Əliyevlə də yollarını ayırıb.