Yeniyetmələr arasında Bakı birinciliyinə yekun vurulub

2 İyun 2019 10:31 (UTC+04:00)

İyunun 1-də Azərbaycan Dövlət Bədən Tərbiyəsi və İdman Akademiyasının stadionunda 2002-2003-cü il təvəllüdlü yeniyetmələr arasında atletika üzrə Bakı birinciliyinə yekun vurulub. Yarışlar Azərbaycan Atletika Federasiyasının (AAF) və Bakı Şəhər Gənclər və İdman Baş İdarəsinin birgə təşkilatçılığı ilə keçirilib. AAF-dan SİA-ya verilən məlumata görə, yarışda 8 komandadan 100-dən çox atlet iştirak edib. Çempionatın ikinci günündə oğlanlar arasında uzunluğa tullanmada Kəsgin Abbaszadə, hündürlüyə tullanmada isə Aydın Bədəlov qalib adını qazanıblar. Qızlar arasında uzunluğa tullanmada Sabrina Zralova, nizə atmada Könül Əliyeva birinci yerə layiq görülüblər. Qaçış növləri üzrə oğlanların yarışında Teymur Salahzadə (200 m) və Vahid Kərimov (800 m) birinci yerdə qərarlaşıblar. Qızların yarışında isə Lamiyə Vəliyeva (200 m) və Günel Manafova (800 m) birinci olublar. Yarışın qalibləri federasiya tərəfindən medal və diplomlarla təltif olunublar.