Azərbaycanın tanınmış bəstəkarı, dirijor, pedaqoq Soltan İsmayıl oğlu Hacıbəyov 1919-cu ildə Şuşa şəhərində anadan olub. İkisinifli ibtidai məktəbi bitirdikdən sonra əmisi Üzeyir Hacıbəyov 1930-cu ildə onu Bakıya gətirir və ailəsinin bir üzvü kimi evində saxlayır. Orta məktəbi başa vurduqdan sonra əvvəl orta ixtisas musiqi məktəbi, sonra isə Azərbaycan Konservatoriyasında oxuyan gənc bəstəkar 1946-cı ildə professor B.İ.Zeydmanın sinfini bitirir. Onun “Qızılgül” musiqili komediyası hələ 1940-cı ildə, Konservatoriyaya daxil olmamışdan əvvəl səhnələşdirilmişdir.
Bəstəkarın “Gülşən” baleti (1950), “Qızılgül” musiqili komediya (1940), iki simfoniya, orkestr üçün konsertin, bir çox mahnı və romansların müəllifi olan bəstəkarın yaradıcılığında uşaqlar üçün də “İsgəndər və çoban” operası, “Oynaq topum” və s. əsərlər yer almışdır.
Soltan Hacıbəyov 1947-ci ildən Azərbaycan Dövlət Konservatoriyasında müəllim, 1947-1962-ci illərdə M.Maqomayev adına Azərbaycan Dövlət Filarmoniyasında bədii rəhbər, 1969-1974-cü illərdə Dövlət Konservatoriyasının rektoru vəzifəsində çalışmışdır.
O, 19 sentyabr,1974-cü ildə dünyasını dəyişmidir. Görkəmli bəstəkar Soltan Hacıbəyov Fəxri Xiyabanda dəfn edilmişdir.
2019-cu ilin may ayında görkəmli Azərbaycan bəstəkarı, professor Soltan İsmayıl oğlu Hacıbəyovun anadan olmasının 100 illiyi tamam olur.
Qeyd edək ki, bu gün, Soltan Hacıbəylinin 100 illiyi münasibəti ilə Azərbaycan Respublikasının Prezidenti İlham Əliyev Sərəncam imzalayıb.