Balıqçılıq təsərrüfatında bu da qadağan edilib

22 Oktyabr 2017 13:55 (UTC+04:00)

Nazirlər Kabineti "Balıqçılıq təsərrüfatı ekspertizasının aparılması Qaydası"nda dəyişiklik edib.

SİA-nın məlumatına görə, balıqçılıq su obyektlərinin vəziyyətinə təsir edə bilən müəssisələrin, qurğuların və digər obyektlərin tikintisi və yenidən qurulması layihələrinin "Balıqçılıq haqqında" qanuna və ekoloji tələblərə uyğunluğunu müəyyən etmək məqsədi ilə Ekologiya və Təbii Sərvətlər Nazirliyi tərəfindən balıqçılıq təsərrüfatı ekspertizası aparılır.

Balıqçılıq su obyektlərinin vəziyyətinə təsir edə bilən müəssisələrin, qurğuların və digər obyektlərin tikintisi və yenidən qurulması layihələrinin qanuna və ekoloji tələblərə uyğunluğuna dair Ekologiya və Təbii Sərvətlər Nazirliyinin rəyi tikintiyə icazə verən orqanların sorğusu əsasında verilir. İndiyə qədər sonra sorğu qeydiyyata alındığı vaxtdan 15 gün müddətində balıqçılıq təsərrüfatı ekspertizasının rəyinin qəbul edilməsi və ya onun qəbul edilməsindən imtina olunması haqqında qərar qəbul edilib. Bundan sonra isə sorğu qeydiyyata alındığı vaxtdan layihəsi ekspertizadan keçirilməsi tələb olunan obyektlərə münasibətdə 15 gün, layihəsi ekspertizadan keçirilməsi tələb olunmayan obyektlərə münasibətdə 5 gün müddətində balıqçılıq təsərrüfatı ekspertizasının rəyinin qəbul edilməsi və ya onun qəbul edilməsindən imtina olunması haqqında qərar qəbul ediləcək.

Qüvvədə olan Qaydaya əsasən işin həlli üçün zəruri olan əlavə sənədlər və ya məlumatlar 15 gündən gec olmayaraq sifarişçi tərəfindən təqdim olunmalı idi. Əlavə sənədlər və ya məlumatlar 15 gün müddətində təqdim olunmadıqda, ərizəyə baxılması ilə bağlı müddətin axımı dayandırılmalı, yalnız həmin sənəd və məlumatlar təqdim olunduğu andan müddət axımı bərpa olunmalı idi. Dəyişikliyə əsasən hər iki halda müddət 15 gündən 5 günə endirilib.

Qeyd edək ki, qüvvədə olan Qaydaya əsasən ekspertizanın mürəkkəbliyi və ya əlavə tədqiqat aparılmasına ehtiyac yaranması səbəbindən balıqçılıq təsərrüfatı ekspertizasının aparılması ilə əlaqədar daha artıq müddət tələb olunduğu hallarda, balıqçılıq təsərrüfatı ekspertizasının aparılması müddəti hər dəfə 15 gün olmaqla, ən çoxu iki dəfə uzadıla bilərdi. Bu müddəa ləğv edilib.