Aliyə Qarayeva qızıl medal qazanıb

Azərbaycan gimnastları Estoniyanın Tartu şəhərində ənənəvi "Miss Valentina 2011" beynəlxalq turnirində 18 medal, o cümlədən 7 qızıl medal qazanıblar. Siasport.az saytı xəbər verir ki, milli yığmanın lideri Aliyə Qarayeva halqa, top, gürz ilə hərəkətlərdə qızıl medal, lentlə hərəkətlərdə isə bürünc medal qazanıb.

Onun komanda yoldaşı Anna Qurbanova halqa və lentlə hərəkətlərdə ikinci yeri tutub, Zeynəb Cavadlı və Samirə Mustafayeva topla və halqa ilə hərəkətlərdə müvafiq olaraq 5-ci və 6-cı yerləri bölüblər.

Ölkəmizi təmsil edən iki qrup kollektivinin çıxışı da uğurlu olub. Anastasiya Prasolova, Ceyla Quliyeva, Cəmilə Hüseynova, Aelita Xələfova, Səbinə Abbasova və Stefani Trayanovadan ibarət əsas qrup 3 lent/2 halqa ilə hərəkətlərdə gümüş, 5 topla hərəkətlərdə bürünc medala sahib olub.

"Neftçi" klubunun yetirmələri Jalə Qaratova, İradə Əhədzadə, Mənsurə Mehdiyeva, Mədinə Həsənova və Aliyə Paşayevadan ibarət digər qrup beş topla kombinasiyada daha yaxşı təsir bağışlayıb. Hakimlər onların çıxışını gümüş medala layiq görüblər.

Bu yarışlarda iştirak edən bütün yeniyetmə gimnastlarımız da Bakıya medallarla qayıdıblar.

Belə ki, Gülsüm Şəfizadə lentlə hərəkətlərdə bütün rəqiblərini geridə qoyub, halqa ilə hərəkətlərə görə gümüş mükafat qazanıb. Onun yaşıdı Ləman Dadaşlı gürzlə hərəkətlərə görə bürünc medalın sahibi olub. Ləman Hacızadə də (1999 il təvəllüdlü) gürz və topla hərəkətlərdə üçüncü nəticə göstərib.

İplə hərəkətlərdə 11 yaşlı Ruqiyyə Səttarovanın tayı-bərabəri olmayıb, Leyla İbrahimova əşyasız hərəkətlərdə üçüncü nəticəni göstərib. Ən azyaşlı təmsilçimiz 7 yaşlı Lala Kramarenko isə əşyasız və halqa ilə hərəkətlərdə ilk qızıl medallarını qazanıb.