Vüqar Həşimov Almaniya klub çempionatında iştirak edir

Beynəlxalq qrossmeyster Vüqar Həşimov şahmat üzrə Almaniya klub çempionatında iştirak edir. Siasport.az saytı xəbər verir ki, o, bu liqada "Verder Bremen" klubunun idman şərəfini qoruyur.
Azərbaycan şahmatçısının komandası 8-ci turda "Vattenşayd", 9-cu turda isə "Emştedden" klublarına qarşı oynayıb. Səkkizinci turda birinci lövhədə ağ fiqurlarla oynayan həmvətənimiz rusiyalı Yevgeni Nayerə qalib gəlib, 9-cu turda isə 30-cu gedişdə hollandiyalı Anişem Giri məğlubiyyətə uğradıb. Birinci görüş 7:1 hesabı ilə "Verder Bremen"in xeyrinə, ikincisi isə heç-heçə (4:4) başa çatıb.
Turnirin lideri norveçli Maqnus Karlsenin və hindistanlı Vişvanatan Anandın oynadığı "Baden-Baden" (15 xal) komandasıdır. Vüqar Həşimovun klubu 13 xalla 2-ci yeri tutur.
Yarış aprel ayında başa çatacaq.