Ümumdünya Statistika Günü ilə əlaqədar Dövlət Statistika Komitəsinin Yasamal rayon şöbəsində tədbir keçirilib. SİA-nın məlumatına görə, görüşdə Bakı şəhər Statistika İdarəsinin rəisi Heydər Qafarov, Yasamal rayon Statistika şöbəsinin rəisi vəzifəsini icra edən Arif Əliyev və digər qonaqlar iştirak ediblər.
Tədbiri giriş sözü ilə açan Yasamal rayon Statistika şöbəsinin rəisi vəzifəsini icra edən Arif Əliyev bildirib ki, Azərbaycanda statistikanın inkişafında dönüş nöqtəsi Ümumilli Liderimiz Heydər Əliyevin 1994-cü il 18 fevralda "Statistika haqqında" imzaladığı qanunla reallaşıb: "Bu gün ölkə Prezidenti cənab İlham Əliyevin statistika sahəsinə qayğısı və bununla bağlı qəbul etdiyi proqramlar, strateji planlar statistika sahəsinin inkişafında və daha da təkmilləşdirilməsində böyük rol oynamaqdadır".
Sonra çıxış edən Yasamal rayon Statistika şöbəsinin aparıcı məsləhətçisi Tünzalə Məmmədova Dövlət Statistika Komitəsinin beynəlxalq əlaqələrindən danışıb: "Dövlət Statistika Komitəsi bir çox beynəlxalq təşkilatlarla və dünyanın 40-dan çox ölkəsinin statistika orqanları ilə əməkdaşlıq edir və məlumat mübadiləsi aparır".
Daha sonda çıxış edən "Forward Cargo" MMC-nin sədri Əfqan Səftərov "Ümumdünya Statistika Günü" münasibəti ilə Dövlət Statistika Komitəsinin bütün kollektivini təbrik edərək gələcək işlərində onlara müvəfəqiyyətlər arzu edib.
Tədbir diskusiyalarla davam etdirilib.