Ey məni özünə "can" bilən canan.
Canımdan can çıxır, hardasan indi?
Deyirdin "kədərə atmaram səni"
Həsrət məni yıxır, hardasan indi?
-Canımdan can çıxır, hardasan indi?
İncidir ağrılar, artır hər zaman.
Bu gündən sabaha qalmayıb güman.
Başımın üstünü bürüyür duman
İldırım sərt çaxır, hardasan indi?
-Canımdan can çıxır, hardasan indi?.
Qoymusan eşqimə əngəl, qadağa.
İstirab salıbdır məni yatağa.
Sənsiz məhkum oldum tənha otağa.
Otaq məni sıxır, hardasan indi?
-Canımdan can çıxır, hardasan indi?
Ucalıb harayım, ucalıb naləm.
Səsimi dinləmir, eşitmir aləm.
Zəhərlə doludur eşqi-piyaləm.
Gözümdən qan axır, hardasan indi?
-Canımdan can çıxır, hardasan indi?
Gedərək etmisən çaşqın Qəribi.
Sellərə qatmısan daşqın Qəribi.
Qəribəm, olmuşam eşqin Qəribi.
Eşqin ürək yaxır, hardasan indi?
-Canımdan can çıxır, hardasan indi?
Rauf Qərib (Alagözov)