İyunun 4-dən 8-dək İtalyanın Rimini şəhərində Kikboksinqin WAKO versiyası üzrə növbəti Dünya Kuboku keçiriləcək. SİA-nın məlumatına görə, yarışda Azərbaycan milli komandası da mübarizə aparacaq. İdmançılarımız low-kick, kick-light, full-kontakt, light-kontakt üzrə yarışacaqlar. Yığmamıza milli komandamızın rəisi Sadıq Bağırov rəhbərlik edəcək. Millimiz yarışa iyunun 3-də yola düşəcək. Dünya Kubokunda tanınmış idmançılarımızdan Fuad Zeynalov (kick-light) və Eduard Məmmədov (low-kick) da iştirak edəcək. 89 kq çəki dərəcəsində ölkəmizi təmsil edəcək Fuad Zeynalov SİA-ya açıqlamasında yarışa ciddi hazırlaşdığını bildirib: "Dünya Kubokuna yüksək səviyyədə hazırlıq prosesi keçmişəm. Həm fiziki, həm taktiki-texniki, həm də pisixoloji cəhətdən özümü tam hazır hiss edirəm. Rəqiblərimin döyüşlərini izləmişəm və təhlil etmişəm. Dünya Kubokunda ən yüksək nəticəni qazanmağa çalışacağam. Ümüd edirəm ki, Vətənə qızıl medalla qaydacağam".