Şair - sözünə köçür,
Tənha izinə köçür.
Düyünləyib boğçasın,
Qəfil özünə köçür.
Hissini çözə bilir,
Sözünü düzə bilir.
Duyğuların selində
Batsa da, üzə bilir.
Kimliyi yada gəlməz,
Tüstüsü oda gəlməz.
Əritdiyi sözlərin
Acısı dada gəlməz.
Hətta adam içində,
Duyğu - onu seçimdə.
Sözünə tay olacaq
Tapılmır boy-biçimdə.
Sözünün körpüsü var,
Hisslərin hörgüsü var.
Özünü görmək üçün
Gözünün güzgüsü var.
Gözlərindən keç - yaşat.
Bu şairi seç - yaşat.
Gözü önündə olma.
Ürəyinə köç - yaşat.
Xanım İsmayılqızı