"Qəbələ" klubunun baş məşqçisi Roman Qriqorçuk Antalya toplanışı çərçivəsində baş tutan "Qəbələ" - PSV-2 (Hollandiya) (0:0) matçının ardından hazırlıq barədə fikirlərini bildirib. SİA-nın məlumatına görə, o, futbolçuların yaxşı çalışdıqlarını qeyd edib: "Hazırda işlərimiz, hazırlıq prosesimiz davam edir. Ümumi nə isə demək üçün çox tezdir. Futbolçularımız səylə çalışır. Oyunumuz haqda yalnız fevralın 1-i - "Bakı" ilə qarşılaşmadan sonra danışa bilərik. Hazırkı dövr həmin matça hazırlıq dövrüdür. Yeni futbolçularımız - Rəşad Sadiqov və Aleksey Qay təcrübəli futbolçulardır. Bizim onların oyununa, komandaya xeyir verib-verməyəcəklərinə dair hər hansı bir şübhəmiz yox idi. Onlar zaman ötdükcə öz səviyyələrini göstərirlər. Heyətimizə qatdığımız gənc futbolçular isə çalışırlar və daha çox çalışmalıdırlar".